Мэҥэ Хаҥаласка 387 туонна от кэбиһилиннэ

Мэҥэ Хаҥалас улууһугар 570 киһи уонна 373 тиэхиньикэ окко үлэлии таҕыста. 1674 га иэннээх сир охсулунна, 387 туонна от кэбиһилиннэ.

Былырыыҥҥы сылы кытта тэҥнээтэххэ, кураан дьыл туран, үүнүү мөлтөҕүнэн, хаалан иһэбит: былырыын баччаларга 1770 туонна от бэлэмнэниллибитэ, диэн «Эркээйи» хаһыат суруйар.

Уопсайа улуус үрдүнэн 41927 туонна былаантан, нэһилиэктэр биэрэр сабаҕалааһыннарынан, 29269 эрэ туонна оту ылар балаһыанньа үөскээтэ. Бу былаан 71 бырыһыаныгар тэҥ. Онон ыраах баран оттуур мобильнай биригээдэлэри тэрийии үлэтэ ыытыллар, 18 сайаапка киирбитин туһунан улуус кылаабынай агронома Василий Бурнашев иһитиннэрдэ.

Биригээдэлэр көһөн тиийэн, Дьокуускай куорат арыыларыгар, Хаҥалас, Амма улуустарыгар оттуохтаахтар. От ыйын 20 күнүттэн Чыамайыкы звенолара Төхтүр сиригэр оттуу барыахтара.

Улахан хаһаайыстыбалартан «Тумул» тыа хаһаайыстыбатын кэпэрэтиибэ уонна «Хорообут» ХЭТ тэрээһиннээхтик окко киирдилэр. Нөөрүктээйи нэһилиэгин хаһаайыстыбалара 100 туонна оту бэлэмнээтилэр. Бу күннэргэ элбэх от охсуллан баран ардахха былдьанна, халлаан көннөрдөр эрэ бары күргүөмүнэн тахсан үлэни үмүрү тутуохтара.

Хаачыстыбалаах оту бэлэмниир сыалтан балаҕан ыйын 2 күнүгэр диэри сүөһү аһылыгын бэлэмнээһин кыраапыга оҥоһуллан, олохтоох бэйэни салайыныы сэбиэтигэр бигэргэммитэ. Бу нэдиэлэттэн туһааннаах исписэлиистэр нэһилиэктэринэн сылдьан от үлэтин хаамыытын, бурдук үүнүүтүн көрүөхтэрэ, сабаҕалааһыннары оҥоруохтара.