Мэҥэ Хаҥаласка арыгыттан сылтаан үс холуобунай дьыала тэрилиннэ

ИДьМ Мэҥэ Хаҥалас оройуонунааҕы салаатын дьуһуурунай чааһыгар киэһэ балыыһаттан быһаҕынан анньыллыбыт киһи киирбитин туһунан иһитиннэрии киирбит.  Бэрэбиэркэ кэмигэр биллибитэ,  быһылааҥҥа эмсэҕэлээччи бииргэ олорор, Булуҥ улууһуттан төрүттээх  32 саастаах дьахтара кыттыгастаах эбит.

Быһаарыллыбытынан,  эр киһи уонна дьахтар бииргэ арыгылаабыттар. Ол олорон аны этиһэн,  иирсээн турбуттар. Дьахтар быһаҕы ылан эр киһитин өттүгэр, сыҥааҕын аннынан быһаҕынан анньыбыт. Дьахтарга РФ Холуобунай кодексын 115 ыст. 2 ч. («Умышленное причинение лёгкого вреда здоровью») холуобунай дьыала көбүтүллүбүт.

Арыгылааһын эмиэ өссө биир холуобунай дьыала тэриллиитин төрүөтүнэн буолла диэн ИДьМ пресс-сулууспата иһитиннэрэр. Ол курдук, Мэҥэ Хаҥалас улууһугар  Үөһээ Дьааҥы улууһуттан төрүттээх 31 саастаах эр киһи арыгылыы олорбут  киһитин кытары айдаарсан баран, муннун тоһуппут. Эр киһиэхэ РФ Холуобунай колексын  112 ыст. 1 ч.  холуобунай дьыала тэриллибит.

Аллараа Бэстээххэ арыгылааһын 12 тыһ. солкуобайдаах  суотабай төлөпүөн алдьаныытынан түмүктэммит.  25 саастаах олохтоох киһи  билэр дьахтарын кытары этиһэн баран төлөпүөнүн алдьаппыт.  Эр киһиэхэ РФ Холуобунай кодексын 167 ыст. 1 ч. холуобунай дьыала көбүтүллүбүт.