Мэҥэ Хаҥаласка бу саас сүппүт эр киһини көрдөөһүнү сөргүттүлэр

Балаҕан ыйын 17 күнүгэр түөрт быыһааччы Мэҥэ Хаҥалас улууһун Чыамайыкытыгар бу саас сураҕа суох сүппүт эр киһини көрдүү барда. Бу туһунан СӨ Быыһыыр сулууспата иһитиннэрэр.

Биллэринэн, 60 саастаах эр киһи муус устар 30 күнүгэр атынан үөр сылгыны көрдүү барбыт. Ыта батыспыт. Киһи сүппүтүн туһунан Мэҥэ Хаҥаластааҕы ЕДДС-ка ыам ыйын 6 күнүгэр биллэрбиттэр.

Атын «Үүт ыйаабыт» диэн сылгы базатыттан 15-20 км тэйиччи сытар сиртэн булбуттар. Бу сэлиэнньэттэн 30 км ыраах сытар сир.

Эр киһини бастаан олохтоохтор бэйэлэрэ көрдөөбүттэр, оттон ыам ыйын 10 күнүгэр быыһааччылар көрдөөн саҕалаабыттар. Ыта дьиэтигэр төннүбүт. Икки нэдиэлэни быһа көрдөөбүттэр. Билигин онно иккис кылаастаах быыһааччы Станислав Захаров салалтатынан быыһааччылар бөлөхтөрө турунна.