Мэҥэ Хаҥаласка быйыл «Социальнай гаастааһын» бырагырааматынан 187 ыалга гаас киириэ

Дойду үрдүнэн «Социальнай гаастааһын» федеральнай бырагыраама 2021 сыллаахтан олоххо киирэн, өрө күүрүүлээхтик барар.

Мэҥэ Хаҥалас улууһугар 2022 сыллаахтан бу бырагырааманан 510 дьиэ гааһынан хааччыллыбыт. Оттон быйыл бырагыраама нөҥүө 159 сайаапка киирбит, былааҥҥа 187 дьиэни гааһынан хааччыйар сорук турар.
Күн бүгүн бырагыраама нөҥүө 12 дьиэ күөх төлөҥҥө холбоммут.

Бу бырагырааманан гаас ситимэ учаастакка диэри босхо тардыллар, онтон дьиэҕэ диэри тардыыны хаһаайыттар бэйэлэрэ уйуналлар. Ол эрэн, Саха сирин чэпчэтиинэн туһанар олохтоохторугар социальнай гаастааһын бырагырааматын таһынан дьиэҕэ диэри гаас ситимин тардыыга 150 000 солкуобайдаах көмө көрүллэр диэн Мэҥэ Хаҥалас улууһун дьаһалтатын пресс-сулууспата иһитиннэрэр.

Бу өҥөнөн Аҕа дойду сэриитин бэтэрээннэрэ, огдооболоро, тыыл бэтэрээннэрэ, байыаннай дьайыы бэтэрээннэрэ, кинилэр дьиэ кэргэттэрэ, Ленинград блокадатын кыттыылаахтара, элбэх оҕолоох дьиэ кэргэттэр, тиийинэн олоруу алын кээмэйин 1,5 төгүл ылбыттан кыра дохуоттаах дьон, үлэлээбэт, соҕотох олорор биэнсийэлээхтэр дохуоттара тиийинэн олоруу алын кээмэйин 2 төгүл ылбыттан кыра буоллаҕына, ону тэҥэ Арассыыйа байыаннай сулууспалаахтара, анал байыаннай дьайыы кыттыылаахтара уонна кинилэр дьиэ кэргэттэрэ туһанар кыахтаахтар.