Мэҥэ Хаҥаласка дартска өрөспүүбүлүкэтээҕи күрэхтэһии буолла

Эрдиини ыһыктымыахха наада бу олоххо,
Бырахтыҥ да сүүрүк хоту сурулуу устаҕын,
туох да быыһаабат,
Арбаҕастаах да абыраабат.

Борис Кэм.

Василий Павлович Кириллин «эрдиитин ыһыктыбатаҕа». Төһө да доруобуйатынан хааччахтаах буоллар, сирдээҕи аналын чиэстээхтик толорон: ыал буолан, оҕо төрөтөн, иитэр сүөһүнү күрүөлээн, дьон тэҥинэн оттоон-мастаан, уопсастыбаннай олох оргуйар үөһүнэн сылдьан, сиэн оҕолор минньигэс сыттарын билэн бу олохтон барбыта.

Кини Мэҥэ Хаҥалас Хочотугар төрөөбүтэ. Инбэлииттэр уопсастыбаларын биир саамай көхтөөх чилиэнэ буолан, араас күрэхтэргэ кыттан мэлдьитин бириистээх миэстэлэргэ тиксэрэ, дьонун-сэргэтин, дьиэ кэргэнин үөрдэрэ. Ол курдук волейболга, хабылыкка, хаамыскаҕа, дартска, кэлээскэлээх үҥкүүгэ кыттара. Саамай сөбүлээн кыттар дьарыга — дартс этэ.

Бу күннэргэ Майа сэлиэнньэтигэр Василий Павлович Кириллин эдьиийэ, педагогическай үлэ бэтэрээнэ, РФ уопсай үөрэхтээһинин Бочуоттаах үлэһитэ Кычкина Раиса Иннокентьевна, кэргэнэ Кириллина Клавдия Федоровна уонна оҕолоро көҕүлээннэр, дартска өрөспүүбүлүкэтээҕи күрэх буолан ааста.

Турнир аһыллыытыгар Майа сэлиэнньэтин баһылыгын солбуйааччыта Игнатьев Дмитрий Александрович, 2-с  Наахара  нэһилиэгин баһылыгын солбуйааччы Барашков Анатолий Анатольевич, В.П.Кириллины кытта өр сылларга бииргэ алтыспыт Алексеева Марфа Васильевна тыл эттилэр.

Маныаха 6 улуустан 88 киһи кытынна. Күрэх икки бөлөҕүнэн ыытылынна: саҥа уонна уоппуттаах оонньооччулар. Күрэхтэһиини улуустааҕы инбэлииттэр уопсастыбалара тэрийдэ.

Кылаабынай судьуйанан Майа сэлиэнньэтин дартска тренера Птицын Евгений Алексеевич үлэлээтэ.
Бэрт эрийсиилээх күөн күрэс кэнниттэн түмүк маннык буолла. Саҥа оонньооччуларга туһааннааҕынан 1, 2, 3 миэстэлэр, эр дьоҥҥо: Март Иванов (Мэҥэ Хаҥалас), Василий Иванов (Нам), Виктор Суханов (Нам).
Дьахталларга: Анна Слепцова (Нам), Лидия Сивцева (Мэҥэ Хаҥалас), Татьяна Цыденжапова (Мэҥэ  Хаҥалас). Уоппуттаах оонньооччуларга, эр дьоҥҥо: Михаил Стручков (Мэҥэ Хаҥалас), Юрий Третьяков (Хаҥалас), Виктор Черемкин (Мэҥэ Хаҥалас). Дьахталларга: Заредина Сосина (Мэҥэ Хаҥалас), Евдокия Степанова (Хаҥалас), Мария Соломонова (Хаҥалас). Күрэх муҥутуур кыайыылааҕынан 16 киһини кэннигэр хаалларан Василий Иванов буолла.

Кыайыылаахтар грамотанан, сыаналаах бириистэринэн наҕараадаланнылар. Харчынан бириэмийэни Кириллин В.П. эдьиийэ, кэргэнэ, оҕолоро, аймахтара, бириистэри Майа, 2-с Наахара нэһилиэктэрин дьаһалталара, инбэлииттэр уопсастыбалара, Василий Павлович үөлээннээхтэрэ туруордулар. Бириистэри Василий Павлович кэргэнэ Клавдия Федоровна туттарда.

Кириллин Василий Павлович олоххо тардыһыыта, эр санаата ыччакка холобур буолар.

Елена Прокопьева, уопсастыбаннай кэрэспэдьиэн.