Мэҥэ Хаҥалас улууһун киинигэр диализ киинин аһарга чааһынай килииникэ этии киллэрбит. 14 куойкалаах бырайыагы олоххо киллэрэргэ 350 кв м иэннээх эбийиэк наада эбит. Билигин сөп түбэһэр эбийиэги көрдүүллэр. Бу кэнниттэн Роспотребнадзор көҥүлэ наада. Улуус баһылыга Дмитрий Тихонов иһитиннэрбитинэн, диалиһы оҥорор өҥө булгуччулаах мэдиссиинискэй страховкалааһыҥҥа киирэн, чааһынай килииникэ тустаах ыарыһахтары босхо көрүөҕэ.
Мэҥэ Хаҥаластааҕы киин балыыһа кылаабынай бырааһын солбуйааччы Наталья Федорова иһитиннэрбитинэн, улуус үрдүнэн диализ эмтэниитин 21 киһи ыларыттан иккитэ Хара нэһилиэгэр баар. Кинилэр бары тустаах эмтэниини Дьокуускай ааһаллар эрээри, саас уонна күһүн өрүс суола сабылларын саҕана айаннарыгар эрэйдэнэллэрин туһунан салайааччы кэпсээтэ. Наталья Федорова эбии быһаарбытынан ирдэбил быһыытынан тустаах киини 60 ыарыһахха анаан аһыахтаахтар. Бу ирдэбил кыаллар кыахтаах, өскөтүн Илин эҥээр улуустарыгар аналлаах киини аһар буоллахха.
Санатар буоллахха, Мэҥэ Хаҥалас улууһугар олунньу 14-17 күннэригэр уонна 20-гэр СӨ бырабыыталыстыбатын отчуота буола турар. Түмүктүүр отчуот олунньу 20 күнүгэр Майаҕа уонна Аллараа Бэстээххэ буолар. Бөлөҕү СӨ үбүн миниистэрэ Валерий Жондоров салайар.