СИА хаартыската
Мэҥэ Хаҥалас улууһугар үөрэх управлениетын иитэр үлэҕэ уонна эбии үөрэхтээһиҥҥэ салаатын сүрүн исписэлииһэ Николай Тарасов улуус үөрэҕин ситимигэр үүнэр көлүөнэ кэнчээри ыччаты гражданскай-патриотическай иитии үлэтэ “Дьоруой биир дойдулаахтарбынан киэн туттабын” бырайыагынан ыытылларын туһунан кэпсииригэр бу үлэ хаһааҥҥытааҕар да тирээн турар суолталаммытын бэлиэтээтэ.
— Мэҥэ Хаҥалас улууһун үөрэҕин ситимигэр үүнэр көлүөнэ кэнчээри ыччаты гражданскай-патриотическай иитии үлэтэ “Дьоруой биир дойдулаахтарбынан киэн туттабын” бырайыагынан ыытыллар. Бырайыак иһинэн үөрэнээччилэргэ төрөөбүт түөлбэни таптааһыны иҥэрэр, дойдуга бэриниилээх буолууну иитэр-үөрэтэр суолталаах үлэлэр киирэллэр. Ол курдук, оскуола оҕолоро улууска сыллата ыытыллар «Култуура уонна успуорт» эстафетатыгар кыттан нэһилиэктэрин чиэһин көмүскээһиннэрэ, улуус биллиилээх дьоннорун үөрэтии, дьоһун олохторунан холобур оҥостуу, “Төрүччүм – инникигэ сирдиир кынатым” бастакы кылаас үөрэнээччилэригэр туттарыллар альбомнар уонна да атын тэрээһиннэр буолаллар.
Биир сүрүн хайысханан улуус бары үөрэнээччилэрэ үөрэх сылыгар туттар дневниктарын — Мэҥэ Хаҥалас үөрэнээччилэрин күннүктэрин таһааран туһаныы буолар. Күннүккэ Мэҥэ Хаҥалас улууһун 100 чулуу дьоннорун, ол иһигэр 11 дьоруой аатын сүгэр биир дойдулаахтарбытын сырдатар информациялар киллэриллэн, кинилэр тустарынан үөрэнээччилэр алын кылаастан саҕалаан билсэн улааталлар. Улууспутугар барыта 60 үөрэх тэрилтэтэ үлэлиириттэн 31 үөрэх тэрилтэтэ Мэҥэ Хаҥалас киэн туттар дьоннорун ааттарын сүгэллэр. Ол курдук улууспутугар сахалартан бастакы Сэбиэскэй Сойуус Дьоруойун Федор Кузьмич Попов аатынан Баатара орто, Гражданскай сэрии геройун Кеша Алексеев аатынан Хаптаҕай орто, улууска бэйэтин үбүнэн бастакы оскуоланы саҕалаабыт, меценат Герасим Иванович Соловьев аатынан Ороссолуода орто, Академик Владимир Петрович Ларионов аатынан Майа орто уо.да. оскуолалар ситиһиилээхтик үлэлииллэр. Сыллата үөрэх кыһаларын кэлэктииптэрэ киэн туттар биир дойдулаахтарын үйэтитэн научнай-практическай ааҕыылары, күрэхтэһиилэри уонна араас тэрээһиннэри ыыталлар. Сыл түмүгүнэн гражданскай-патриотическай хайысхаҕа бастыҥ көрдөрүүлээх улуус оскуолаларын 10 үөрэнээччилэригэр “Герой биир дойдулаахтарбынан киэн туттабын” лауреат аата иҥэриллэн, улуус аҕа баһылыгын бириэмийэтэ туттарыллар.
Патриотическай хайысха үлэлэринэн оскуолаларга аналлаах кулууптары тэрийии, Сэбиэскэй Сойуус Дьоруойа Ф.К. Попов аатын үйэтитэр сыаллаах уонна ыйдарынан суолталаах тэрээһинэрии ыытыы буолаллар. Улуус 20 оскуолаларыгар байыаннай-патриотическай кулууптар 700-чэкэ оҕону, 10 оскуолаҕа Бүтүн Арассыыйатааҕы хамсааһын “Юнармия” 300-чэкэ үөрэнээччини хабан, тэриллэн үлэлииллэр. Сыллата “Снежный барс” байыаннай-спортивнай оонньуу күрэҕэ улуус оскуолаларын группаларынан уонна түһүмэхтэр кыайыылаахтарын улуустааҕы финалын быһыытынан ыытыллар. 2023 с. Аллараа Бэстээх М.Е. Попов аатынан орто оскуола “Факел” байыаннай-патриотическай кулууба улууска бастаан быйыл Чурапчыга ыытыллыбыт өрөспүүбүлүкэтээҕи күрэхтэһиигэ ситиһиилээхтик кыттыбыта.
2022-2023 үөрэх сылыгар ахсынньы ыйга Дьоруойдар декадалара, олунньуга Аҕа дойдуну көмүскээччилэр ыйдара үрдүк тэрээһиннээхтик ыытыллыбыттара. Олунньу ый 16 күнүгэр В.Н. Оконешников аатынан Павловскай орто оскуолатыгар байыаннай-патриотическай кулууп кыттыылаахтара Саха сиригэр кэлэ сылдьар Степков А.А., Приморскай кыраай бэтэрээннэрин союһун бэрэсэдээтэлин солбуйааччытын, Емельянова М.Е., Саха Өрөспүүбүлүкэтин саллааттарын уонна мотуруостарын ийэлэрин кэмитиэттэрин бэрэсэдээтэлин кытта көрсүһүүлэрэ ыытыллыбыта. Олунньу 22 күнүгэр Мэҥэ Хаҥалас улууһун баһылыга Дмитрий Тихонов, байыаннай эпэрээссийэ кыттыылаахтара уонна бойобуой дьайыылар бэтэрээннэрэ улуус оскуолаларын 10-11 кылааһын уолаттарын түмэн Аҕа Дойдуга бэриниилээх буолууга кэпсэтиилэрэ үрдүк таһымҥа буолан ааспыттара. Месячник былаанынан Сталинград кыргыһыытын уонна саха буойуннара Ильмень күөлгэ дьоруойдуу охсуһууларын 80 сылыгар аналлаах улуустааҕы научнай-практическай кэнпириэнсийэҕэ үөрэнээччилэр сэрии бэтэрээннэрин бойобуой суолларын чинчийэн, поисковой үлэлэрин түмүгүнэн рапортары көмүскээн улуустааҕы кыраайы үөрэтэр түмэл дьиэтигэр туттардылар.
Кулун тутар 3 күнүгэр И.М. Романов аатынан Төхтүр оскуолатын тэрийиитинэн улуустааҕы Юнармия слета ыытыллыбыта. Слетка байыаннай эпэрээссийэ кыттыылаахтара, Дьокуускайдааҕы кадетскай оскуола-интернат педагогтара, үөрэнээччилэрэ уонна Саха өрөспүүбүлүкэтин ДОСААФ-ын, ис дьыала улуустааҕы отделын бэрэстэбиитэллэрэ кыттыыны ылбыттара. Тэрээһин кэрэхсэбиллээх түгэннэринэн ыалдьыттары кытта кэпсэтии, быыстабкалар, Юнармия кэккэтигэр 74 саҥа чилиэннэри ылыы буолбуттара.
Сэбиэскэй Сойуус Дьоруойа Ф.К. Попов аатынан Баатара орто оскуолата тэрийиитинэн “Баатара Баатырдара” өрөспүүбүлүкэтээҕи байыаннай-спортивнай оонньуулар Тарабукин Владислав Эдуардович, байыаннай эпэрээссийэ кыттыылааҕын, оскуола кадетскай кылааһын выпускнигын, кадетскай интернат офицер-воспитателин сырдык кэриэһигэр уонна оскуола кадетскай кылааһын выпускниктарын, байыаннай эпэрээссийэ кыттыылаахтарыгар ананан кулун тутар 25 күнүгэр Сыымах сэлиэнньэтигэр ыытыллыбыта. Тэрээһиҥҥэ Ньурба техническэй лиссиэйин, Мүрү №1 орто оскуолатын уонна улуус оскуоларын байыаннай-патриотическай кулууптара кыттыыны ылбыттара.
2022-2023 үөрэх сылын ыам ыйын 26-29 күннэригэр улуус оскуолаларын 170-ча онус кылааһын уолаттарын түмэн, учебнай-полевой сбордарын ыытан түмүктүүбүт.
Лев Павлов көҥүл тустууга юниордар истэригэр аан дойду чөмпүйэнээтигэр үрүҥ көмүс мэтээли ылары ситистэ. Кини…
Бүгүн, балаҕан ыйын 8 күнүгэр, Саха сирин соҕуруу, хотугулуу-илин, күнүс арҕаа улуустарыгар сорох сиринэн ардах,…
Бүгүн НТВ ханаал “Чудо” биэриитигэр Сунтаар улууһун Элгээйи орто оскуолатын үөрэнээччитэ, эдэр орнитолог, 11 саастаах…
Аҕыйах хонуктааҕыта Сунтаар улууһун Куокуну нэһилиэгэр Улахан Табаҕа киэҥ нэлэмэн, үрдүк үүнүүнү биэрэр бааһыната талах…
Оҕо барахсан хайа да кэмҥэ арахсыспат аргыһа – оонньуур буоллаҕа. Онон “Наука 0+” билим бэстибээлин…
Бу күннэргэ өрөспүүбүлүкэ улуустарыгар ититии сезона саҕаланан эрэр. Мэҥэ Хаҥалас улууһун пресс-сулууспата дьаһалта телеграм-ханаалыгар иһитиннэрбитинэн,…