Мэҥэ Хаҥаласка итирик суоппар дьахтар суолтан түҥнэстибит

Мэҥэ Хаҥалас улууһугар дьахтар суол быһылааныгар түбэспит. Алтынньы 31 күнүгэр киэһэ 22 чаас саҕана массыынатын сатаан салайбакка суолтан туораан, саахалга түбэспит.

Суол бэрээдэгин кэтээччилэр боротокуолларынан, 29 саастаах дьахтар уруулга арыгы иһэн баран олорбута биллибит. Дьахтар массыынаҕа соҕотох айаннаан испит, арыгы испитин таһынан курдамматах эбит. Массыына түҥнэстибит, суоппар дьахтар онтон сылтаан улахан эчэйиини ылбыт. Кинини тута балыыһаҕа тиксэрбиттэр. Бу суоппар дьахтар ааспыт сылга эмиэ итирик туруктаах түбэһэн, административнай эппиэтинэскэ тардылла сылдьыбыт, ону ааһан суоппардыыр бырааба быһыллыбыт эбит.