Мэҥэ Хаҥаласка Кыһыл кинигэҕэ киллэриллибит көтөрдөрү бултаабыттар

Мэҥэ Хаҥаласка сокуоннайа суох бултааһын дьыалатын булбуттар. Кыһыл кинигэҕэ киллэриллибит тыһы уонна атыыр мороду кустары бултаабыттар, диэн Экология министиэристибэтэ иһитиннэрэр.

Кыһыл кинигэҕэ киллэриллибит көтөрдөрү кытары булчут түөрт тыһы чөркөөкүнү уонна тыһы моонньоҕону бултаабыт. «Быһылаан тахсыбыт сиригэр ИДЬМ оперативнай бөлөҕө ыҥырыллыбыт», — диэн иһитиннэриигэ биэдэмистибэ биллэрдэ.

Буруйдааҕы уонна былдьаммыт мороду кустары процессуальнай бэрэбиэркэ үлэһиттэригэр туттардылар. Булчут көтөр сэдэх көрүҥнэрин суох оҥорууга сыһыаннаах ыстатыйаларынан улахан суумаҕа ыстарааптанар эбэтэр холуобунай дьыалаҕа тардыллыан сөп.