Мэҥэ Хаҥаласка муҥхаҕа 130 уол оҕо кытынна

Бэҕэһээ  2-с Наахара нэһилиэгин Балыктаах күөлүгэр үгэскэ кубулуйбут улуус оскуолаларын үөрэнээччилэрин төрүт дьарыкка уһуйар муҥха тэрилиннэ. Бу туһунан Мэҥэ Хаҥалас улууһун баһылыга Дмитрий Тихонов иһитиннэрдэ.

— Майа сэлиэнньэтин, Хара, 2-с Наахара нэһилиэктэрин уонна Аллараа Бэстээх бөһүөлэгин оскуолаларыттан быһа холоон 130 уол оҕо кыттыыны ылан, муҥха сиэрин-туомун кытта билистилэр. Бу тэрээһин оҕолорго саха төрүт дьарыгын баһылыылларыгар, айылҕалыын алтыһалларыгар сүрүн олук буолар.

Тэрээһини оҕолорбутугар тэрийбит 2-с Наахара нэһилиэгин дьонугар-сэргэтигэр, нэһилиэк Аҕа баһылыгар Петр Никитиҥҥа махтанабын, эбэбит көмүс хатырыктааҕыттан күндүлээн, Күөх Боллох оҕонньор ыччаттарын сэмсэ өлүүлээн муҥхаһыттарбыт илии тутуурдаах, өттүк харалаах, харахтарыгар уоттаах дьиэлэригэр тарҕастылар.

Уолаттарбын этэҥҥэ сылдьан, аҕыйах сылынан бастыҥ дьиэ кэргэн аҕа баһылыктара буолун диэн алгыыбын!- диэн иһитиннэрдэ Дмитрий Тихонов.