Мэҥэ Хаҥаласка саахал түмүгэр биир киһи өлбүт, түөрт киһи араас эчэйиини ылбыт

Бүгүн сарсыарда, олунньу 15 күнүгэр, Мэҥэ Хаҥалас оройуонугар суол саахала таҕыста. Саахал түмүгэр биир киһи өлбүт, өссө түөрт киһи араас эчэйиини ылбыт.

Бу туһунан Мэҥэ Хаҥалас оройуонун Госавтоинспекциятыгар иһитиннэрдилэр. Быһа холоон сарсыарда 08:20 чааска «Халыма» айан суол 27-с км «Тойота-Витц» уонна «Форд Иксион» массыыналар харсыспыттар.

«Тойота-Витц» иномарка массыына суоппара Дьокуускай өттүттэн Төҥүлү сэлиэнньэтин диэкки айаннаан иһэн, массыынаны ситэн ылаары, суол утары балаһатыгар тахсан биэрбит. Саахал буолбут сиригэр «Форт Иксион» массыына 53 саастаах пассажира суорума суолламмыт. Икки суоппар балыыһаҕа киирбит, ону таһынан икки пассажир.

«Тойота-Витц» суоппара мэйиитин доргуппут, төбөтүн эчэппит, оттон 25 саастаах пассажирка тоҥолоҕун уонна атаҕын уҥуохтарын тоһуппут. «Форт Иксион» 42 саастаах суоппара түөһүн уонна тоҥолоҕун уҥуохтарын тоһуппут, 46 саастаах пассажир атаҕын улахан уҥуоҕун тоһуппут. Суол быһылааныгар силиэстийэлиир-суһал бөлөҕө үлэлиир. Буолбут чахчынан бэрэбиэркэ ыытыллар.