Мэҥэ Хаҥаласка саҥа хотоннор тутулуннулар

Мэҥэ Хаҥалас улууһун Нөөрүктээйи, 3-с Мэлдьэхси нэһилиэктэригэр  саҥа аныгылыы тииптээх хотоннор тутуллан үлэҕэ киллэрилиннилэр. 

Саҥа тутуулар үлэҕэ киириилэрин үөрүүлээх тэрээһинигэр тыа хаһаайыстыбатын миниистирин бастакы солбуйааччыта Анна  Стручкова, улуус баһылыга Дмитрий Тихонов кытыннылар. 

Петр Петрович Шамаев салайааччылаах «Михаил Егоров» хаhаайыстыба өрөспүүбүлүкэ, улуус, олохтоох дьаһалта өйөбүллэрин ылан, ону тэҥэ бэйэтэ утары үп эбэн, барыта 51 мөлүйүөн сыаналаах 120 төбөҕө анаммыт аныгылыы оҥоһуулаах хотону тутан киллэрдэ. Тэрилтэ икки хотонунан барыта 418 сүөһүнү иитэн турар.

— Денис Константинович Жирков салайааччылаах «Томтор» ХЭТ өрөспүүбүлүкэбит Тыа хаһаайыстыбатын министиэристибэтэ «Кыра кыамталаах тыа хаһаайыстыбатын эбийиэктэрин тутуу» бырагырааматынан өйөбүл ылан, эбии бэйэтэ үп уган, 11 мөлүйүөҥҥэ 100 төбөҕө анаммыт хотону тутта. Тэрилтэ быйыл 200 төбө ынах сүөһүнү кыстыкка киллэрдэ.  Саҥа хотоннор ирдэбилгэ эппиэттиир, сырдык, үлэһиттэр үлэлэрин чэпчэтэр гына оҥоһулуннулар.

Улууспутугар биллэриллибит үс сыллаах тыа хаһаайыстыбатын сылларыгар, оҥорон таһаарыы хас нэhилиэк ахсын баар буоларыгар туһуламмыт үлэбитигэр бу күн биир бэлиэ түгэнинэн буолар.
Петр Петровиһы, Денис Константиновиһы, салайар хаһаайыстыбаларын бары үлэһиттэрин саҥа хотоннор киирбиттэринэн эҕэрдэлээн туран таһаарыылаах үлэни, этэҥҥэ буолууну, бигэ туругу баҕарабын, — диэн Дмитрий Тихонов телеграмҥа ханаалыгар иһитиннэрдэ.