Мэҥэ Хаҥаласка суол саахалыгар икки киһи эмсэҕэлээтэ

Мэҥэ Хаҥалас улууһун Судаарыстыбаннай автоинспекциятын отделениета иһитиннэрбитинэн, бэҕэһээ, балаҕан ыйын 18 күнүгэр 9 чаас 30 мүнүүтэҕэ «Амма» айан суолун 27-с килэмиэтиригэр 1993 сыллаах төрүөх суоппар, «FAW J6» мааркалаах тырааныспарынан, Майа сэлиэнньэтиттэн Аллараа Бэстээх бөһүөлэгэр диэки айаннаан иһэн, хаҥас диэки туораары «Патриот» УАЗ массыынаны кытары харсыста.

Бу кэмҥэ 1997 сыллаах төрүөх «Патриот» УАЗ массыынаны ыытан испит суоппар, иннигэр айаннаан иһэр массыынаны ситээри утары балаһаҕа тахсан биэрэн, «FAW J6» мааркалаах тырааныспары кытта харсыспыт.

Суол быһылаанын түмүгэр «Патриот» УАЗ массыына суоппара уонна пассажира эт-хаан араас эчэйиитин ыланнар, суһал көмө массыынатынан балыыһаҕа киирдилэр.

Суол-тырааныспар саахала тахсыбытынан бэрэбиэркэ ыытыллар.

Судаарыстыбаннай автоинспекция суоппардарга суол быраабылатын тутуһарга уонна суолга эрэхтээх буоларга ыҥырар.