Мэҥэ Хаҥаласка сылааһы балаҕан ыйын 9 күнүттэн холбуохтара

Саха сиригэр оттук сезона Аллайыаха улууһуттан саҕаламмыта. Ити атырдьах ыйын 8 күнүгэр этэ. Аны билигин атын улуустарга хочуолунайдар үлэлэрин саҕалаары бэлэмнэр.

Ол курдук, Мэҥэ Хаҥалас улууһугар балаҕан ыйын 9 күнүттэн сылааһы холбуохтара. Улууска 61 хочуолунай баар. Итилэртэн 38 хочуолунай – айылҕа гааһынан, 23 – таас чоҕунан үлэлииллэр. Ититэр ситим уһуна – 120 км.

Хас нэһилиэк аайы социальнай эбийиэктэри, элбэх кыбартыыралаах дьиэлэри, кэтэх да ыаллары “СӨ ОДьКХ” ГУП Мэҥэ Хаҥаластааҕы филиала хааччыйар (дириэктэр И.Э.Яковлев).

Филиал былаан быһыытынан өрөмүөн үлэтин бэркэ тэрийэн ыытта.

Ону тэҥэ “СӨ ОДьКХ” ГУП инвест бырагырааматыгар олоҕуран, Моорук Суолатыгар модульнай гаас хочуолунай (бэдэрээтчит -«МИП» Сахаэнергоэффект») тутулла турар. Бөкөҕө эмиэ гааһынан үлэлиир хочуолунайы “Траст” ХЭТ бэдэрээтчит тута сылдьар, билиҥҥи туругунан, 80 бырыһыан бэлэм буолбут. Дойдуунускай нэһилиэгэр таас чоҕунан оттуллар хочуолунайы туталлар  (бэдэрээтчит — “Техсервис” ХЭТ).   Бу хочуолунайдар быйыл үлэҕэ киириэхтээхтэр.

Онон филиал салалтата бэдэрээтчиттэри кытта ыкса үлэлэһэр. Балаҕан ыйын 1 күнүттэн хомунаалынай хаһаайыстыба бары үлэһиттэрэ үлэҕэ тахсыахтара. Уонна, үөһээ этэн аһарбыппыт курдук, балаҕан ыйын 9 күнүттэн улууска сылааһы холбуохтара.