Мэҥэ хаҥаластар биатлоҥҥа күрэхтэстилэр

Муус устар саҥатыгар Араҥас нэһилиэгэр буулдьанан ытыыга Саха Өрөспүүбүлүкэтин успуордун маастара, Саха АССР норуоттарын кыһыҥҥы алтыс спартакиадаларын уонна 1974 сыллааҕы «Урожай» уопсастыба биатлоҥҥа чөмпүйүөнэ Гаврил Васильевич Цыпандин бирииһигэр биатлоҥҥа аһаҕас күрэхтэһии быйыл үһүс төгүлүн тэрилиннэ. Ол туһунан Мэҥэ-Хаҥалас улууһун дьаһалтатын пресс-сулууспата иһитиннэрэр.

Быйыл Мэҥэ Хаҥалас нэһилиэктэриттэн – Төҥүлү, Хаптаҕай, Томтор, Хорообут, Араҥас, Мэҥэ, Тараҕай, Холгума, Нөөрүктээйи, Алтан, Доллу, 1-кы Наахара нэһилиэктэриттэн, Майа түөлбэтиттэн, Аллараа Бэстээхтэн уонна Алдан куораттан, уопсайа 35 спортсмен кытынна.

Ол курдук, биирдиилээн бастыыр иһин саастарынан күрэххэ:

14-17 диэри саастаахтарга – кыргыттарга Валерия Кривогорницына (Алдан к.), уолаттарга – Николай Нестеров (Бырама);
18-39 саастаахтарга – дьахталларга Мира Павлова (Хаптаҕай), эр дьоҥҥо – Николай Зыков (Өлөчөй);
40-55 саастаахтарга – дьахталларга Оксана Сергеева (Томтор), эр дьоҥҥо – Яков Попов (Төҥүлү);
55 үөһээ саастаах бэтэрээн дьахталларга – 1960 с.т. Клара Винокурова (Аллараа Бэстээх), эр дьоҥҥо – 1959 с.т. Николай Яковлев (Томтор) кыайыыны ситистилэр.
Ону таһынан, «Бастыҥ ытааччы» анал ааты Тимур Баишевка (Төҥүлү), «Бастыҥ биатлонистка» анал ааты Валерия Кривогорницынаҕа (Алдан) иҥэрдилэр.

Күрэхтэһии кыраҕы харахтааҕы, сымса атахтааҕы, бастыҥтан бастыҥнары быһаарда.

«Биатлон көрүҥүн сайыннарар, тарҕатар, нэһилиэнньэни успуордунан дьарыктанарга көҕүлүүр, спортсменнар маастарыстыбаларын үрдэтэр сыаллаах-соруктаах ыытыллар тэрээһиммит бу курдук успуорду таптааччылары түмэ, кэҥии, сайда турдун», — диэн тэрийээччилэр санааларын этэллэр.