Хаартыска И.Н. Егоров тиксэрииитэ
Кэнники сылларга Саха сиригэр бөрөлөр элбээбиттэрин туһунан элбэхтик иһиллэр буолла. Ардьай аһыылаах адьырҕа кыыллар, бөрөлөр уонна эһэлэр элбээн, дьон олорор сиригэр чугас киириилэрэ, киһиэхэ саба түһүүлэрэ, сүөһүнү-сылгыны тардыылара элбээтэ.
Урукку кэмҥэ бөрөнү, эһэни бултааһыны судаарыстыба сүрүннээн, анаан бултаан, ахсааннарын аҕыйатар буоллахтарына, билигин оннук суох. Ардьай аһыылаахтар элбээн, сүөһүгэ-сылгыга саба түһэн, тыа хаһаайыстыбатыгар да, экэниэмикэҕэ да үлүгэрдээх хоромньуну оҥороллор. Онон нэһилиэнньэҕэ куттал үөскээтэҕинэ эбэтэр нэһилиэктэргэ бэйэлэрэ биригээдэ тэринэн бултууллар.
Бу күннэргэ Мэҥэ Хаҥалас улууһун Наахаратыгар сылгы баазалаах Игнатий Егоров сур бөрөнү бултаабыт бастыҥ сонордьукка убаһа бэлэхтээбитин идэһэлээбиттэрин видеота социальнай ситиминэн тарҕанна. Игнатий Егоров сыл ахсын саамай элбэх бөрөнү өлөрбүт киһиэхэ убаһа бириис туруорар эбит. Кини бу үтүө бачыыма атын да улуустарга холобур буолан, тарҕаныан сөп.
Игнатий Егоров «СибСтройМонтаж» диэн тэрилтэҕэ дириэктэрдиир, уон сыл анараа өттүгэр сылгы баазатын тэриммит. Кини бөрөнү бултааһын уонна үтүө бачыым туһунан маннык кэпсиир:
— Бөрө аһара элбээбитигэр толкуйдаан баран, Мэҥэ Хаҥалас улууһунааҕы айылҕа харыстабылын иниспиэксийэтин нөҥүө илин эҥээр бөрөһүттэрэ диэн бөлөх тэриммиппит. Бу бөлөхпүт ааспыт алта сылга уопсайа 170-тан тахса бөрөнү ылла. Бастаан бэйэм, Мэҥэ Хаҥалас улууспар саамай элбэх бөрөнү өлөрбүт киһиэхэ убаһа туттарар этим. Бөлөхпүтүгэр уус алданнар, аммалар, хаҥаластар бааллар. Онон былырыыҥҥыттан бу улуустарга элбэх адьырҕаны бултаабыт киһиэхэ эмиэ убаһа биэрэр буоллум. Былырыын Амма улууһун Болугуруттан Георгий Филиппов ылбыта. Оттон мэҥэ хаҥаластарга маннык убаһаны туттарбытым алтыс сыла.
Кэнники сылларга адьырҕа кыыл ахсаанын бириэмэтигэр бэрээдэктээбэтэхтэриттэн, элбээтэ дии саныыбын. Урут бэрээдэктэнэр буолан, ама этэ. Биһиги кэнники сылларга улууспутугар бултаһаммыт, аҕыйаппыппыт. Оттон билигин эмиэ киирэн эрэллэр. Биһиги улууспутугар бөрөлөр сүрүннээн икки сиринэн, Уус Алданынан уонна Хаҥалаһынан киирэллэр. Сылгылаах дьон атын улуустарга бөрөһүттэри, эсэһиттэри өйүө этилэр. Эһэ эмиэ элбээтэ, дэриэбинэҕэ чугаһыыр, дьоҥҥо, сүөһүгэ-сылгыга кутталы үөскэтэр.
2025 с. бу бөлөхпүт дьоно уонтан тахса эһэни ыллылар. Быйылгы сыл түмүгүн ахсынньы 31 күнүгэр таһаарыахпыт, билиҥҥитэ Мэҥэ Хаҥалас улууһугар Уткин Семен бөрөнү бултааһыҥҥа бастаан иһэр. Сыл түмүгүнэн бастаабыт киһиэхэ убаһабытын аныыбын, онтун күһүн ылар. Ити тарҕаммыт видеоҕа былырыыҥҥы кыайыылаах уолбут, Мэҥэ Хаҥалас улууһун Лоомтукатыттан Петр Кириллин кэлэн убаһатын ылан, идэһэ оҥостубута көстөр. Кини былырыын уонча бөрөнү ылан, өрөспүүбүлүкэҕэ иккис миэстэ буолбута. Дьиҥэ, Мэҥэ Хаҥалас улууһугар биир бултаммыт бөрөҕө 50 тыһ. солк. көрөннөр, бөрөһүттэргэ улахан көмө оҥоһуллар. Ону таһынан бөрөһүттэр көхтөрүн үрдэтэн биһиги бэйэбит эмиэ бастыҥнарга наҕараада олохтуубут.
Суукка иһигэр өрөспүүбүлүкэҕэ икки буруйу оҥоруу тахсыбыта бэлиэтэннэ. Бу туһунан СӨ Борокуратуурата иһитиннэрэр. Дьокуускай куоракка…
Оҕолору анал кириэһилэтэ суох таһыы иһин ыстараап икки бүк кэриҥэ улаатар. Ол курдук, тохсунньу 9…
Бу күннэргэ Тымныы полюһунан аатырар Өймөкөөн нэһилиэгэр туристар үгэс быһыытынан тоҕуоруһа мусталлар. Тымныы хаһаайынын --…
Тохсунньу 8 күнүгэр Мэҥэ Хаҥалас улууһун отделын дьуһуурунай чааһыгар «Халыма» федеральнай суолга суол быһылаана тахсыбытын…
Бүгүн былааннары олоххо киллэрэргэ табыгастаах кэм. Бу күн бэрээдэги, эппиэтинэстээх буолууну ирдиир. Ол эрээри, Ый…
Саха сирин синоптиктарын иһитиннэриитинэн, бүгүн, тохсунньу 10 күнүгэр, өрөспүүбүлүкэҕэ соҕуруулуу-арҕаа, соҕуруу, илин өттүгэр кыралаан хаардыыр,…