Мэҥэҕэ Саҥа дьыллааҕы дьаарбаҥка тэрээһиннээхтик ааста

Бу күннэргэ Мэҥэ Хаҥалас улууһун Аллараа Бэстээхтээҕи култуура киинигэр «Саҥа дьыллааҕы дьаарбаҥка» атыы-эргиэн дьаарбаҥката ыытылынна.

Тэрээһини улуустааҕы «Бизнес инкубатор» уонна «Мин биисинэһим» киин тэрийэн ыыттылар. Дьаарбаҥкаҕа уопсайа улуус 28 маастара, урбаанньыта, кондитердара, эбии дьарыктаах дьон кыттыыны ыллылар. Бу күн атыыга үүт-эт, тоҥ астан фарш, хаан, эт, балык, туорт арааһа, бурдук аһа, отон, лечо, быар туорда, ону таһынан бэйэ оҥоһуу оонньуурдар, мас оҥоһуктар, дьиэҕэ туттуллар маллар, кинигэлэр турдулар.

Дьаарбаҥкаҕа саҥа дьыллааҕы туорт 1500-2000 солкуобайга, мастан харыйа оонньуурдара 180 солкуобайтан үөһэ сыанаҕа атыыланнылар. Ону тэҥэ, баҕалаах дьоҥҥо баататтан Тымныы оҕонньор оҥоһугун, саҥа дьыллааҕы чүмэчи уонна нобилистан дьиэҕэ уурар киэргэл оҥоруутугар маастар-кылаастар ыытылыннылар.

Бу күн мэҥэлэр дьаарбаҥкаттан саҥа дьыллааҕы астарын, минньигэс туортарын, бэлэхтэрин атыылаһан астынан-дуоһуйан тарҕастылар диэн Мэҥэ Хаҥалас улууһун дьаһалтатын пресс-сулууспата иһитиннэрэр.