Мэҥэлэр сири нүөлсүтэр үлэни ыыталлар

Балаҕан ыйын 6 күнүгэр Мэҥэ Хаҥалас улууһугар мелиорация эбийиэктэрин боппуруостарынан СӨ тыа хаһаайыстыбатын миниистирин эбээһинэһин толорооччу Петр Попов, Сири оҥоруу уонна тыа хаһаайыстыбатын уунан хааччыйыы салалтатын салайааччыта Дмитрий Махаров кэлэн үлэлээтилэр.

Улуус дьаһалтатын пресс-сулууспата иһитиннэрбитинэн, Хорообут нэһилиэгэр ууну халытан сири нүөлсүтүү ситимин, I Баатараҕа Оҕустаах күөлүгэр ууну хаһаанар тутуу туругун миэстэтигэр тиийэн көрдүлэр.

Төҥүлүгэ нэһилиэктэр баһылыктарын, хаһаайыстыбалар салайааччыларын кытта көрсөн улууспутугар турар тыын боппуруостары дьүүллэстилэр, мелиорация сайдарыгар инники былааннары торумнастылар.

Суола үрэххэ сааскы халаан уутун хаайан, оттуур ходуһалары халытан нүөлсүтүүнү сылын ахсын СӨ Тыа хаһаайыстыбатыгар министиэристибэтин Илин эҥэрдээҕи мелиорацияҕа управлениета тэрийэн ыытар.

Нүөлсүтэр ситим үлэтэ күүстээх буолан алдьаныы-кээһэнии  да баар. Онон манна күүстээх өрөмүөн үлэтэ ыытыллара эрэйиллэр. Олохтоохтор бу боппуруоһу күүскэ туруорустулар. Өрөспүүбүлүкэ бары улуустарыгар тыа хаһаайыстыбата туруктаах буоларыгар, сүөһү аһылыгын бэлэмнииргэ мелиорация үлэтэ сытыытык турар. Ситэриилээх былаас отчуоттарыгар өрүү бу боппуруос сытыытык турар.

Онон Мэҥэ Хаҥалас улууһугар олус наадалаах үлэ кэмигэр ыытылла турар.