Мэҥэлэр «Земскэй аграрий» бырагырааманы олоххо киллэрэргэ этии киллэрдилэр

Парламеҥҥа норуот дьокутааттара Мэҥэ Хаҥалас улууһун оройуоннааҕы Мунньаҕын дьокутааттарын кытта көрүстүлэр.

Бу туһунан Ил Түмэн пресс-сулууспата иһитиннэрэр. Мунньаҕы Ил Түмэн Сир сыһыаннаһыыларыгар, айылҕа ресурсаларыгар уонна экологияҕа сис кэмитиэтин бэрэссэдээтэлэ Андрей Находкин салайан ыытта.

Улуус мунньаҕын дьокутаата Надежда Федотова мунньахха бэлэмнэнэн кэлэн, Мэҥэ Хаҥалас улууһугар тыа хаһаайыстыбатын салаатыгар баар сүрүн кыһалҕаларын туһунан кэпсээтэ уонна кээпэрэтииптэр үлэлэригэр болҕомтотун уурда. Чуолаан, үүт уонна эт сыаната үрдээн, кээпэрэтииптэринэн эмиэ сыана үрдээһинэ бэлиэтэнэрин эттэ. Ону сэргэ, кини аграрнай секторга эдэр исписэлиистэри тардыы уонна миэстэтигэр олохсуйа хаалларыы наадалааҕын чопчулаата. Итинэн сибээстээн, норуот дьокутааттарыгар «Земскэй быраас» уонна «Земскэй учуутал» курдук бырагыраамаларга сөп түбэһиннэрэн, «Земскай аграрий» бырагырааманы олоххо киллэрэргэ этии киллэрдэ. Оччотугар Саха сирин үрдүнэн тыа хаһаайыстыбатын идэтигэр ыччаты тардыы хайысхата биллэрдик тупсуохтааҕын ыйда.

Норуот дьокутаата Александр Корякин эдэр исписэлиистэри олорор дьиэнэн хааччыйыы нэһилиэнньэ үгүс туруорсар боппуруоһа буоларын ыйда.

«Тыа сиригэр үлэҕэ эдэр исписэлиистэри тардар олус уустук. Бүддьүөт эйгэтин исписэлиистэригэр Саха сирин үрдүнэн олорор дьиэнэн хааччыйыыга 3,2 тыһыынчаттан тахса дьиэ тутуллара сабаҕаланар. Билигин олорор дьиэнэн хааччыйыы  сорох кээмэйэ өрөспүүбүлүкэтээҕи «Үтүө дьыала» бырагыраама чэрчитинэн, ону тэҥэ тыа хаһаайыстыбатын үлэһиттэригэр «Тыа сирин кэлимник сайыннарыы» судаарыстыбаннай бырагыраама иһинэн көрүллэр. Инникитин тыа сиригэр эдэр исписэлиистэри тардыыга уонна олорор дьиэнэн хааччыйыыга туспа бырагыраама оҥорорго кыһаллыахпыт», — диэн Александр Корякин хоруйдаата.