Миэдиктэр байыаннай дьайыы кыттыылаахтарын көрүстүлэр

Атырдьах ыйын 24 күнүгэр миэдиктэр уоппускаҕа кэлбит байыаннай дьайыы кыттыылаахтарын аэропорка көрүстүлэр. Кинилэргэ Ил Дархан Айсен Николаев аатыттан саха быһахтарын бэлэхтээтилэр.

Доруобуйа харыстабылын миниистирин солбуйааччы Надежда Федорова байыастарга эр санааларын, хорсун быһыыларын иһин махтанна. Кини мэдиссиинэ тэрилтэлэригэр байыаннай дьайыы кыттыылаахтара доруобуйаларын чөлгө түһэринэллэригэр көмөлөһөр сыаллаах “от күөх көрүдүөр” баарын иһитиннэрдэ.

Ол эбэтэр, байыастар туох да  уочарата, төлөбүрэ суох наадыйар мэдиссиинэ көмөлөрүн судургутук ылар кыахтаахтар диэн Доруобуйа харыстабылын министиэристибэтин пресс-сулууспата иһитиннэрэр.