Миграннар Арассыыйа гражданина буолаары сымыйанан кэргэн ылаллара тохтуон сөп

Арассыыйа гражданина буолаары үгүс мигрант Арассыыйаҕа кэлэн сымыйанан кэргэн ыла охсор албастарын Судаарыстыбаннай Дуума дьокутааттара тохтотоору гыналлар.

Ол курдук, «О правовом положении иностранных граждан в Российской Федерации» диэн Федеральнай сокуоҥҥа уларытыыны киллэрии туһунан сокуон барылын бастакы ааҕыыта түмүктэммит. Бу уларытыы Арассыыйа гражданствота суох миграннар сокуону кэһэн туран, сымыйанан ыал буолбута буолар албастарын  тохтотуон сөп. Бу туһунан социальнай ситимҥэ Галина Данчикова суруйбут.

Сокуон бырайыагар сурулларынан өскөтүн, тас дойду олохтооҕо РФ олохтооҕун кытта холбоһон оҕоломмут буоллаҕына уонна кинилэр суут бигэргэппитинэн чахчы бииргэ олорор эрэ буоллахтарына, ону даҕаны Арассыыйаҕа олорор туһунан сайабылыанньатын оҕо икки сааһын туолуор диэри биэрбит эрэ буоллаҕына көҥүллэниэн сөп.