Михаил Архипов: “Дириҥ билиилээҕин көрдүм”

Амма улууһун киин балыыһатын кылаабынай бырааһа, улуус Мунньаҕын дьокутаата Михаил Архипов олохтоох бэйэни салайыныы туһунан кэпсэтиигэ ыытыллыбыт “төгүрүк остуолга” сылдьан баран, Ил Түмэн бэрэссэдээтэлэ Алексей Еремеев турар боппуруоһу олус үчүгэйдик билэрин, онон даҕаны дириҥ хорутуулаах эппиэттэри биэрбитин бэлиэтээтэ.

“Мин бу көрсүһүүгэ сылдьан баран, Ил Түмэн спикерэ Алексей Ильич боппуруоһу олох үчүгэйдик, ис иһиттэн билэр эбит диэн сыаналаатым. Үлэлээбитэ да ырааппыт буолан, Төрүт Сокуону, олохтоох бэйэни салайыныыга да сокуону бэркэ илдьиритэн, лоп бааччы быһааран биэрбитин астынным. Аны саамай сөбүлүү уонна сэргии көрбүтүм диэн, ханнык баҕарар боппуруоска үчүгэй хоруйдары биэрдэ. Кини 33 Федеральнай Сокуоҥҥа өйдөтүү үлэтин ыытта. Манна киирэр уларытыылар киһиттэн таһыччы киирэр уларытыылар буолбатахтар диэн улууспут олохтоохторо өйдүөхтэрин наада. Маны тэҥэ Төрүт Сокуоммут сорох ыстатыйалара уларыйан биэрбиттэрэ саха норуотугар куһаҕан дьайыыны оҥорбот. Мин бэйэм хас да сыл дьокутааттаатым. Биһиги Арассыыйа региона буоларбыт быһыытынан федеральнай сокуоҥҥа киирэр уларыйыыларга сөп түбэһиннэрэн сокуоннарбытын көрөн, уларытан биэрэн кэллибит. Ону бары өйдүөх тустаахпыт. Уопсайынан бу буолбут көрсүһүүттэн наһаа астынным, сэргээтим. Кэллиэгэлэрим да оннук санаалаахтар. Мунаахсыйар боппуруостарбытыгар эппиэттэри ыллыбыт. Тыа да хаһаайыстыба буоллун, олох -дьаһах коммунальнай хаһаайыстыбата да буоллун, экология, үөрэхтээһин да боппуруоһа буоллун. Манна барытыгар чопчу эппиэттэри биэрэн астынныбыт. Ил Түмэн спикерэ тус бэйэтэ сылдьан норуоту кытта атах тэпсэн олорон кэпсэтэн барбыта олус кэрэхсэбиллээх, бу практика салҕаныан баҕарабыт. Быыбар туһунан боппуруоска тохтоохтохпуна, биһиги өрөспүүбүлүкэбитигэр икки таһымнаах былаас хаалан, онно киирэр быыбар систиэмэтин реформата сөптөөх уонна табыгастаах дии саныыбын”, — диэн этэр Михаил Архипович.

“Амма олоҕо” хаһыат