Михаил Гуляев байыаннай госпиталга сырытта

Ил Түмэн Ыччат дьыалаларыгар, физическэй култуураҕа уонна успуорка сис кэмитиэтин бэрэссэдээтэлэ Михаил Гуляев 1 №-дээх А.А.Вишневскай аатынан Киин байыаннай килиниичэскэй госпиталыгар сылдьан эмтэнэ сытар байыаннай сулууспалаахтары кытары көрүстэ.

Ол туһунан сис кэмитиэт ыстаарсай референэ Светлана Диодорова иһитиннэрдэ.

Норуот дьокутаата байыаннайдары кытта көрсөн кэпсэттэ, суһал байыаннай дьайыыларга сылдьан бойобуой сорудахтары толорорго эр санааланыы холобурун көрдөрбүттэрин, хорсун быһыыларын иһин махтанна.
Михаил Гуляев эппитинэн, биһиги уолаттарбыт Арассыыйа сайдарын, эйэлээх олоххо олорорун туһугар олохторун толук уураллар, эчэйиини ылаллар.
«Билиҥҥи кэмҥэ биһиги көмүскээччилэрбитигэр бары өттүнэн өйөбүл наада. Госпиталь эмчиттэрэ уонна мэдиссиинэ үлэһиттэрэ биһиги дьоруойдарбыт үтүөрэн, чөллөрүгэр түһэн, этэҥҥэ, кыайыынан кынаттанан дойдуларыгар төннөллөрүн туһугар бары кыһамньыларын уураллар. Биһиэхэ барыбытыгар эһиги дьиҥнээх дьоруойдар буолаҕыт!», – диэтэ дьокутаат байыаннай сулууспалаахтары кытта көрсөрүгэр.