Михаил Лебедев: “Дойдубут туруорар сүҥкэн соруктарын толоруохпут”

Бүгүн, сэтинньи 11 күнүгэр, Хотугу сир кыһалҕаларыгар физико-тиэхиньиичэскэй  институт төрүттэммитэ 55, ону төрүттээччи академик Николай Васильевич Черскэй төрөөбүтэ 125 сылларыгар аналлаах  XII Евразийскай симпозиум саҕаланна.

Маны таһынан учуонайдар намыһах климатическай температуралаах усулуобуйаҕа чиҥ тутул  уонна ресурса кыһалҕаларын дьүүллэһиэхтэрэ.

Евгений Лукин, тиэхиньиичэскэй билим хандьыдаата, В.П. Ларионов аатынан Хотугу сир кыһалҕаларыгар физико-тиэхиньиичэскэй  институт дириэктэрин э.т:

“Бүгүн Санкт-Петербурдааҕы политиэхиньиичэскэй университеттан, Москваттан, Иркутскайтан, Новосибирскайтан РНА Сибиирдээҕи салаатын бэрэссэдээтэлин солбуйааччыта, академик Дмитрий Маркович симпозиум үлэтигэр кытта, үбүлүөйдээх даатабытынан эҕэрдэлии кэллилэр. Бүгүн 7 тиэмэнэн сүрүн хайысхалары көрүөхпүт. Институт 70-с сыллартан саҕалаан, өрөспүүбүлүкэ оҥорон таһаарар күүстэрин сайыннарыыга сүҥкэн көмөнү оҥорон барбыта. Онон бу сабыытыйа билим эрэ гиэнэ буолбакка, өрөспүүбүлүкэҕэ эмиэ билиниллэр”.

“Саха сиринээҕи билим киинэ” ФИЦ генеральнай дириэктэрэ акакдемик Михаил Лебедев, Николай Васильевич Черскэй билим чинчийиилэрэ бүгүн да наадалаахтарын, кини үлэлэригэр сигэнэллэрин, кини төрүттээбит структурата бүгүн да тирэхтээхтик үлэлии олорорун эттэ.

“Бүгүн биһиги иннибитигэр сүҥкэн соруктар тураллар, өрөспүүбүлүкэбит, дойдубут туруорар уустук уонна олус наадалаах соруктара. Ону биһиги институппут үлэһиттэрэ улуу чинчийээччилэрбит үлэлэригэр тирэҕирэн, ситиһиилээхтик толороллоругар, кыахтаахтык олоххо киллэрэллэригэр эрэнэбин”, — диэтэ кини.

55 сыл анараа өттүгэр Дьокуускайга академик Николай Васильевич Черскэй төрүттээбит Хотугу сир кыһалҕаларыгар физико-тиэхиньиичэскэй  института аһыллыбыта. Институт үс подразделениеҕа: энэргиэтикэ, тымныыны тулуйуу салааларыгар уонна теплофизика лабаратыарыйатыгар тирэҕирэн төрүттэммитэ. Бастаан онно 100 киһи, 2 билим дуоктара, 1 билим хандьытаата үлэлиирэ. 1979 сылтан РНА чилиэн-кэрэспэдьиэнэ Юрий Уржумцев салайбыта. Кини туруорсуутунан институкка 4 идэҕэ хандьытаат истиэпэнин көмүскүүр диссертационнай сэбиэт тэриллибитэ.