Михаил Мишустин: «Искэни эмтиир эмп оҥоһуллан бүтэн эрэр»

Хаан рагын эмтиир Арассыыйа эмтэрэ уонна искэннэри утары эмтэр оҥоһуллууларын бүтэһик түһүмэҕэр сылдьалларын туһунан РФ бырабыыталыстыбатын бэрэссэдээтэлэ Михаил Мишустин иһитиннэрдэ.

Арассыыйа бырабыыталыстыбатын бэрэссэдээтэлэ Минскэйгэ ыытыллыбыт «Саҥа технологиялар сойуустара: Кэлэр кэм индустриятын үөскэтии» диэн Иннопром пленарнай мунньаҕар тыл этэригэр, дойду иһинээҕи фармацевтическай салаа кэнники кэмҥэ улахан ситиһиилэрин бэлиэтээтэ.

Кини Арассыыйа учуонайдара гемофилияҕа бастакы оригинальнай геннай терапия эмин оҥорбуттарын ахтан ааста диэн «РИА-Новости» ааҕыныстыба суруйар.

«Атын да инновационнай эмтэри оҥоруу эмиэ бүтэһик түһүмэххэ сылдьар – хаан рагын эмтииргэ уонна искэни утары эмтэргэ», — диэн  Мишустин бэлиэтээтэ.

Санатар буоллахха, атырдьах ыйын 3 күнүгэр Гамалея аатынан Национальнай эпидемиология, микробиология чинчийэр киинин дириэктэрэ Александр Гинцбург меланомалаах ыарыһахтар искэнтэн вакцинаны ылыахтарын сөп диэн иһитиннэрбитэ.