Михаил Никифоров оскуоланы уонна уһуйааны көрдө

Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы Михаил Никифоров ситэриилээх былаас отчуотун чэрчитинэн Тааһаҕар нэһилиэгэр саҥа тутуллубут оскуолаҕа уонна оҕо уһуйааныгар сырытта.

Бу оскуола бастакы сыбаайата 2016 сыллаахха түспүтэ. Онтон ыла күүстээх үлэ баран, 3,4 тыһ.м уопсай иэннээх, 100 миэстэлээх оскуола ааспыт сыл бүтүүтэ үлэҕэ киирэн, аанын тэлэччи аспыта.
Бу эбийиэк «АЛРОСА» АХ Бүлүү улууһугар киирэр дибидиэнинэн үбүнэн тутулунна.
Билиҥҥитэ 89 оҕо үөрэнэр, аҕыйах сыллааҕыта 100-н тахса оҕолоохтор эбит. Онон өссө даҕаны оҕо ахсаана элбиэ диэн эрэллээхтэр.
Онтон оҕо уһуйаана 80-с сылларга тутуллубут. Эргэрэн, самнайан түһэн эрэр. Ол гынан баран, бэркэ тэринэн, оҥостон, быр-бааччы олороллор. Оҕо уһуйаана сэбиэскэй кэми санатардыы, уурбут-туппут курдук оҥоһуулаах, бэл диэтэр, 70-80-с сыллар оонньуурдара хараллан, бүүс-бүтүн тураллара, киһини үөрдэр.
Маннык үчүгэйдик үлэлии олорор уһуйаан саҥа дьиэлэнэрэ буоллар, өссө сайдыа эбитэ буолуо. Ол туһунан эмиэ бүгүҥҥү Бырабыыталыстыба отчуотугар эмиэ туруорустулар.