Михаил Никифоров уу сахалыы номоҕон тыллааҕын дьон астынна

Cаха Өрөспүүбүлүкэтин бырабыыталыстыбатын Бүлүү улууһугар ааспыт сыллааҕы отчуотун кэмигэр оробуочай бөлөх чилиэттэрэ, кэккэ министиэристибэлэр уонна биэдэмистибэлэр бэрэстэбиитэллэрэ нэһилиэктэргэ уонна куоракка биирдиилээн дьону кытары сирэй көрсөн кэпсэттилэр.

Былаас бэрэстэбиитэллэрэ маннык сылдьан нэһилиэнньэ кыһалҕатын, дьон туруорсуутун сирэй көрсөн кэпсэтииттэн истэллэрэ, билэллэрэ үлэни торумнааһыҥҥа, сөптөөхтүк быһаарарга олус сөптөөх.

Бүлүү улууһугар ситэриилээх былаас отчуоттуур бөлөҕүн салайан илдьэ сылдьыбыт  СӨ бырабыыталыстыбатын бэрэссэдээтэлин солбуйааччы Михаил Никифоровы уу сахалыы номоҕон тыллааҕын дьон-сэргэ астыммытын биллэрбитэ.

Михаил Никифоров бу сырыытыгар уопсайа 9 киһини кытары тус көрсөн кэпсэттэ.

Дьон үксүн оттуур сирдэри өттөөһүн, оттонор сирдэргэ нүөлсүтүү (ууну түһэрии), ыанар ынах төбөтүгэр, үүт субсидиятыгар уонна култуурунай-тиэхиньиичэскэй үлэни оҥорууга, агростартапка, онтон да атын тыа хаһаайыстыбатын боппуруостарынан киирдилэр.

Тыа хаһаайыстыбата ыытар куонкурустарын уонна граннарын туһунан нэһилиэнньэни кытары уопсай отчуоттарга даҕаны, тус бэйэлэрэ сирэй көрсөн даҕаны элбэх киһи ыйытта. Онон, итиннэ сөптөөх сырдатар үлэ барыан наада быһыылаах дии санаабын. Итини таһынан, олорор дьиэ-уот боппуруоһа эмиэ үгүстэри долгутар.