Михаил Николаев аатынан уопсастыбаннай эйгэ куонкуруһугар кыттарга биир ый хаалла

Бастакы Бэрэсидьиэн Михаил Николаев аатынан уопсастыбаннай эйгэ архитектурнай кэнсиэпсийэтин оҥорорго аһаҕас куонкурус биллэриллибитэ, сайаапкалары ылыы от ыйын 11 күнүнэн бүтэр. Мемориальнай комплекс Дьокуускайга тутуллар.

Манна архитектураҕа, монументальнай ускуустубаҕа, хонуу дизайныгар идэтийбит дьону кыттарга ыҥыраллар. Үлэ хас да киритиэрийдээх: тиэмэтигэр сөп түбэһэрэ, уус-уран толоруута, тулалыыр эйгэни кытта сөп түбэһиитэ, үйэлээх оҥоһуулааҕа, технологическай да, үп да өттүнэн олоххо киирэр кыахтааҕа, ону тэҥэ Михаил Николаев киһи быһыытынан хайдаҕын толору бэриллиэхтээх.

Ил Дархан иһинэн Архитектура уонна куорат тутуутун управлениетыгар эппиттэринэн, сайаапкалары кумааҕы да, электроннай да көрүҥүнэн ылаллар. Наадалаах сибидиэнньэ барыта биэдэмистибэ официальнай саайтыгар баар, диэн иһитиннэрэр Ил Дархан, бырабыыталыстыба пресс-сулууспата.