Хаартыска: Андрей Сорокин.
Сэтинньи 13 күнүгэр, Саха сирин бастакы Бэрэсидьиэнэ Михаил Ефимович Николаев төрөөбүт күнүгэр, Ил Дархан Айсен Николаев “Билиигинэн кыайыаҥ” судаарыстыбаннай истипиэндьийэлэри туттарда. Лауреаттары наҕараадалааһын “Цифровой алмаас” федеральнай пуорум иитинэн “Үлэ кыбартаала” креативнай кластерга буолла.
Наҕараадаламмыттар ортолоругар – Бүлүү улууһун Тааһаҕар нэһилиэгин “Эйгэ” норуот айымньытын дьиэтин дириэктэрэ Клавдия Петрова. Кини култуура эйгэтигэр 40-тан тахса сыл үлэлээтэ.
“Күрэскэ кыайыы – бу улахан эппиэтинэс. Киһи үлэтин сөбүлүүр буоллаҕына, киниэхэ барыта табыллар диэн бигэ санаалаахпын. Биһиэхэ Норуот айымньытын дьиэтигэр бастыҥ кэлэктииптээхпит, үлэһиттэр бары үрдүк үөрэхтээхтэр, 19 куруһуок уонна түмсүү үлэлиир” – диэн кини бэлиэтиир.
Лауреаттар кэккэлэригэр М.К.Аммосов аатынан ХИФУ 5-с кууруһун устудьуона Анастасия Оконешникова киирдэ. Кини университет көхтөөх кыттааччыта, араас билим кэмпириэнсийэлэрин кыайыылааҕа.
“Маҥнайгы куурустан кэмпириэнсийэлэргэ уонна араас тэрээһиннэргэ көхтөөхтүк кыттабын, ол быыһыгар тэрийээччи быһыытынан эмиэ. Мин билимҥэ үлэм уһулуччу үрдүк молекулярнай полиэтиленынан тымныыны тулуйар матырыйаалы оҥорууга ананар, матырыйаалы тупсарар туһугар манна араас эбиликтэри холбуубун. Миигин кытта маҥнайгы куурустан үлэлэһэр билимҥэ салайааччыбар Сахаяна Николаевна Даниловаҕа уонна Билим коллаборациятын дьиэтин дириэктэригэр Прасковья Георгиевна Никифороваҕа өйөбүллэрин иһин улаханнык махтанабын” – диэн Анастасия санаатын үллэстэр.
Кинилэртэн ураты наҕарааданы В.П.Ларионов аатынан физика-тиэхиньикэ лиссиэйин 11-с кылааһын үөрэнээччитэ Артем Мардин, Аксения уонна Наталья Посельскаялар ааттарынан Дьокуускайдааҕы балет оскуолатын (кэллиэс) устудьуона Алексей Ноговицын ыллылар.
Ону тэҥэ, истипиэндьийэни В.П.Ларионов аатынан физика-тиэхиньикэ лиссиэйин информатикаҕа учуутала Юрий Романовка, Өрөспүүбүлүкэтээҕи лиссиэй-интэринээт математикаҕа учуутала Илья Кысылбаиковка, “Кэнчээри” эстетическэй киин дириэктэригэр Василий Парниковка туттардылар. Үөрэх уонна билим сайдыытыгар улахан кылаатын иһин истипиэндьийэни М.Г.Сафронов аатынан Саха сиринээҕи билим чинчийэр институтун дириэктэрэ Михаил Черосов ылла.
Ил Дархан уонна Бырабыыталыстыба пресс-сулууспата.
Бу күннэргэ Саха сирин улуустарыгар Төрөөбүт тыл уонна сурук-бичик күнүгэр анаммыт тэрээһиннэр салҕаналлар. Биир олус…
Бу үөрүүлээх күҥҥэ СӨ Бырабыыталыстыбатын Бэрэссэдээтэлэ Кирилл Бычков кыттыыны ылла. Гимназия устуоруйата 1990-с сыллар саҥаларыттан,…
Бэҕэһээ, Ийэ тыл, сурук-бичик күнүгэр, Киллэм култууратын дьиэтин үлэһиттэрэ ураты эҕэрдэлэринэн дьону соһуттулар уонна үөртүлэр.…
Бүгүн Уһук Илин тоҕус эрэгийиэнин сүүмэрдэммит хамаандаларын художественнай гимнастикаҕа бастыыр иһин күрэхтэһиилэрин үһүс күнэ Саха…
Төрөөбүт тыл уонна сурук-бичик күнүнэн Таатта улууһун Дьохсоҕон нэһилиэгэр “Саргыланнын-кынаттаннын сахам тылын кэрэтэ-кэрэмэһэ!” диэн өрөспүүбүлүкэ…
Бырабыыталыстыбаҕа Бүлүү бөлөх улуустарга уоту туһаныы кээмэйин диапазоннарын (тарыыптарын) хаттаан көрбүттэр. Сунтаар уонна Ньурба улуустарыгар…