Михаил Прокопьев Бишкекка норуоттар икки ардыларынааҕы турнир призерунан буолла

Саха сирин сүүмэрдэммит хамаандатын боксера Михаил Прокопьев Кыайыы 80 сылыгар анаммыт Аҕа дойду Улуу сэриитин кыттыылааҕа, Сэбиэскэй Сойуус Дьоруойа Дуйшенкул Шопоков аатынан уонна Кыргызстан успуордун 100 сылыгар аналлаах боксаҕа норуоттар икки ардыларынааҕы турнирга боруонса мэтээл хаһаайынынан буолла.

Рингэҕэ маастарыстыбаларын 9 дойду биллэр боксердара көрдөрдүлэр. Михаил 51 киилэҕэ диэри ыйааһыҥҥа үс хапсыһыыны ыытта. Бастакы киирсиигэ Таджикистан боксерун кыайбыта, ол кэннэ Узбекистан спортсменын кыайбыта. Полуфиналга Испания боксерун кытта киирсибитэ, ол эрээри бу сырыыга испанец кыайыылаах тахсыбыта. Михаил Прокопьев үһүс бочуоттаах миэстэҕэ тигистэ, диэн «Триумф» успуорт уораҕайын пресс-сулууспата иһитиннэрэр.