Михаил Сергеев: «Дьиҥнээх дьыаланан көмөлөһүү холобурун көрдөрдүбүт”

Саха сирин ыччата байыаннай эпэрээссийэҕэ барбыт биир дойдулаахтарын  дьиэ кэргэттэригэр, ыарахан балаһыанньаҕа түбэспит ДНӨ уонна ЛНӨ  олохтоохторугар көхтөөхтүк көмөлөһөр.

Волонтер-эдэр гвардеецтар саҥа эрэгийиэннэргэ эмиэ хаста да сылдьан, туох кыалларынан олохтоохторго көмөлөспүттэрэ. Мариуполь куоракка сыаллаах-соруктаах – Арассыыйа саҥа эрэгийиэннэрин олохтоохторугар көмөлөһө барбыттара.

«Эдэр гвардеецтар чуолаан улахан болҕомтону  бэтэрээннэр, кырдьаҕастар, элбэх оҕолоох ыаллар олорор дьиэлэрин алдьаммыт түннүктэрин оҥорорго уурбуттара. Куорат иһигэр аһылык бородууктатын, олоххо-дьаһахха туттуллар наадалаах табаардары илдьэргэ-аҕаларга көмөлөспүттэрэ. Мин санаабар, биһиги Уһук Илин ыччата бэйэтин дьонун алдьархайга хаалларбатын уонна ыраахтан эрэ буолбакка, дьиҥнээх дьыаланан көмөлөһөр холобурун көрдөрдүбүт”, — диэн «Биир ньыгыл Арассыыйа» Эдэр Гвардиятын актыбыыһа,  Донецкай Норуодунай Өрөспүүбүлүкэҕэ   гуманитарнай сыаллаах-соруктаах сылдьыбыт Михаил Сергеев кэпсээтэ.

Баҕа өттүнэн көмөлөһөөччү Михаил Сергеев кутталлаах кэмнэри эмиэ ахтан ааһар. Ол эрэн, ыарахаттары туоруурга Арассыыйа норуоттарын сомоҕолоһуута хаһааҥҥытааҕар да наадатыгар эрэллээх.