Михаил Слепцов «Үрүҥ куйаар алыба» быыстапкатын сэргээҥ

Ахсынньы 22 күнүттэн СӨ Национальнай уус-уран мусуойугар муосчут-худуоһунньук, РФ үтүөлээх худуоһунньуга, Арассыыйа Худуоһунньуктарын сойууһун чилиэнэ Михаил Николаевич Слепцов «Үрүҥ куйаар алыба» тус быыстапката арылынна.

«Михаил Слепцов айар үлэтин Арассыыйа Федерациятын таһымыгар билинэллэр. Тоҕо диэтэххэ, кини үлэлэрэ ураты эстетикалаахтар, биир өттүнэн көрдөххө, олус сэмэйдэр, ол гынан баран дьоһуннаахтар», -– диэн Национальнай мусуой генеральнай дириэктэрэ Влада Тимофеева бэлиэтээн эттэ.
Быыстапка аһыллыытынан ону сэргэ Национальнай мусуой наукаҕа сүрүн үлэһитэ А.Л. Габышева, Саха сирин Худуоһунньуктарын сойууһун бэрэссэдээтэлин солбуйааччы Н.В. Николаева, «Үргэл» Арт-галерея дириэктэрэ Ю.В. Спиридонов, Дьокуускай куорат култуураҕа тэрилтэлэрин бэрэстэбиитэллэрэ, айар куттаах дьон, Абый улууһуттан биир дойдулаахтара, аймахтар уонна худуоһунньук чугас дьоно эҕэрдэлээтилэр.

Үрдүк ускуустубаны сыаналааччылар Михаил Николаевиһы ХХI үйэҕэ национальнай декоративнай-прикладной ускуустуба үгэстэрин салҕааччылартан биирдэстэринэн ааттаатылар. Михаил Слепцов -– 2016 сыллаахха «Арассыыйа норуоттарын муоска оҥоһуктарын ускуустубата» Бүтүн Арассыыйатааҕы бэстибээл Кылаан бирииһин ылбыта. Куонкуруска кыайбыт үлэтин туһунан маастар: «Мин бэйэм үлэбин биһиги өрөспүүбүлүкэбит Уһук Хотугу сиригэр олорор саха норуотугар анаабытым. Уопсастыба ортотугар Хотугу сиргэ эбээннэр уонна эбэҥкилэр эрэ олороллорун уонна кинилэр таба иитиитинэн эрэ дьарыктаналларын курдук санаа эмиэ баар. Дьиҥэр, Хотугу дойдуга аҕыйах ахсааннаах төрүт норуоттары сэргэ, саха норуота эмиэ былыр-былыргыттан олорор.  Мин бэйэм үлэбэр саха норуотун үгэстэрин уонна кини олоҕун укулаатын көрдөрүөхпүн баҕарбытым», -– диэн этэн турар.

Худуоһунньукка Саха сирин Култуураҕа уонна духуобунай сайдыыга министиэристибэтин бочуоттаах үбүлүөйдээх бэлиэтэ туттарылынна.

ххх

Михаил Слепцов — муоска уус-ураннык быһан оҥорууга ураты суоллаах-иистээх маастар. Кини айар буочарын сүгүрүйээччилэрэ эндэппэккэ билэллэр. Ааптар мамонт аһыыта, таба муоһа курдук айылҕа матырыйаалыттан киһи эрэ кэрэхсии көрөр оҥоһуктарын толкуйдаан таһаарар. Кини үлэлэригэр тыа сирин, булчуттар, балыксыттар олохторун көрүөххэ сөп.
Михаил Слепцов уобарастарын киһи аныгылыы хараҕынан көрөр уонна ааптар кэпсиир тиэмэтин өйүнэн-сүрэҕинэн ылынар. Онон, быыстапкаҕа кэлбит хас биирдии киһи бэйэтигэр фантазия эйгэтин уонна ааптар толкуйун арыйыаҕа, кини хатыламмат ускуустубатын бүтүннүү ылыныаҕа.
СҮ үтүөлээх худуоһунньугун  ураты уус-уран дьүһүйүүтэ үксэ төрүттэриттэн, хотугу туундара уонна үрдүк халлаан эйгэтиттэн кэлбит. Маны барытын кини оҕо эрдэҕиттэн этигэр-хааныгар иҥэрэн улааппыта.
Кини 1990 сыллар бүтүүлэриттэн 2000 сыллар саҥаларыгар кэмҥэ үлэлэригэр саҥаттан-саҥа пластическай ньымалары туһаммыта көстөр. Үлэлэригэр «норуот реализма» аһаҕастык тыктарыллар.

Быыстапка 2024 сыл олунньу 4 күнүгэр диэри Киров уулуссатын 9 нүөмэрдээх дьиэтин (Национальнай художественнай мусуой) 2-с этээһигэр, 3-с саалаҕа үлэлиэҕэ. Быыстапкаҕа маастар 30 үлэтин көрүөххүт.