Михаил Варламов «Вызов Севера» турнирга Азия чөмпүйүөнүнэн буолла

Михаил Варламов саха профессиональнай боксатын устуоруйатыгар аан бастаан Азия чөмпүйүөнүнэн буолла.

Саха күрэсчитэ уон раундтаах тыҥааһыннаах киирсиигэ Таиланд боксерун Физит Паочантуэгы кыайда. Саха уола кыайыытын төрөөбүт Сунтаар улууһугар анаата, диэн ЯСИА иһитиннэрэр. Варламов ситиһиитинэн тохтоон хаалбат санаалааҕын эттэ.

«Биһиги Таиланд боксерын кытта киирсибит саахымат партиятын санатта. Быйыл күрэхтэһиигэ улахан эппиэтинэһи биллим. Биллэн турар, тулабар ыалдьааччы бөҕөтүгэр үөрэнэ илик буоламмын, олус долгуйдум. Кыайыыбын төрөөбүт Сунтаар улууһугар, төрөппүттэрбэр уонна бүтүн өрөспүүбүлүкэбэр аныыбын. Азия чөмпүйүөнүн бастакы кура Саха сиригэр тигистэ — ити түмүктэн олус киэн туттабын. Инникитин да үрдүк чыпчааллары дабайыам диэн эрэннэрэбин», — диэн Михаил Варламов санаатын үллэһиннэ.

Ону таһынан, профессиональнай боксаҕа III «Вызов Севера» турнир саха боксердарын чаҕылхай кыайыытынан түмүктэннэ. Азия чөмпүйүөнүн курун Михаил Варламов сүктэ, оттон Арассыыйа чөмпүйүөнүн үрүҥ көмүс курун Назар Андреев ылла.

Турнир кэрэхсэбиллээх түгэннэрэ:

• Михаил Прокопьев Москваттан сылдьар Фикрат Мухаметзяновы кытта киирсиигэ кыайан, сахалартан бастакынан кыайыыны аҕалла.
• Хаҥалас улууһуттан сылдьар Николай Пшенников алта раунд түмүгүнэн суудьуйалар биир санаанан быһаарыыларынан Ирантан сылдьар Мухаммад Камалины кыайда.
• Тыҥааһыннаах алта раундтаах киирсиигэ Никита Малгин уопуттаах Москваттан Игорь Тихоновы баһыйда.
• Кай Адамов уонна Алексей Уваровскай киирсиилэрэ бокса турнирын биир саамай күүтүүлээх түһүлгэтинэн буолла. Уваровскай эрэллээхтик кыайан, «Чөмпүйүөннэр чөмпүйүөннэрин» курун сүктэ. Күрэсчит кыайыытын кыыһыгар анаата.
• Саха уола Назар Андреев Челябинскай куорат бэрэстэбиитэлин Александр Сечконы кыайан, Арассыыйа чөмпүйүөнүнэн буолла.