Михаил Захаров төрөөбүтэ 100 сылын бэлиэтээтилэр

Мэҥэ Хаҥалас улууһугар Нөөрүктээйи нэһилиэгэр уһулуччулаах салайааччы Михаил Павлович Захаров төрөөбүтэ 100 сылын бэлиэтиир бэлиэ күн буолла.

Тэрээһин Ленин аатынан сопхуос искибиэригэр түмсэн баран, И.П. Игнатьев-Кинигэ Уйбаан аатынан кыраайы үөрэтэр түмэл уһаайбатыгар Михаил Павлович мөссүөнүн үйэтитэр бүүһүн үөрүүлээх быһыыга арыйыыттан, сибэкки дьөрбөтүн уурууттан саҕаланна.

Тэрээһин үөрүүлээх чааһыгар улуус баһылыга Дмитрий Тихонов, Ил Түмэҥҥэ  улуус дьокутаата Андрей Находкин, СӨ норуотун хаһаайыстыбатын үтүөлээх үлэһитэ Матвей Мучин,  СӨ норуотун хаһаайыстыбатын үтүөлээх үлэһитэ, СӨ “Ытык сүбэ” бэрэссэдээтэлэ Люлия Григорьева, Нөөрүктээйи нэһилиэгин баһылыга Николай Федоров, Догдоҥо нэһилиэгин баһылыга Петр Сивцев, Мэҥэ нэһилиэгин баһылыга Александр Куприянов, Тараҕай нэһилиэгин баһылыга Афанасий Порядин мустубут бар дьоҥҥо эҕэрдэ тылларын эттилэр, Михаил Павлович үтүө аатын ахтан-санаан аастылар.

Салгыы Михаил Павлович үлэтин суолун кэрэһэлиир иккис түһүмэҕин Нөөрүктээйи нэһилиэгин “Экспресс” саҥа көлүөнэ бибилэтиэкэтин сэбиэдиссэйэ Нина Колосова иилээн ыытта. Манна Михаил Павлович сиэн оҕолоро, ыччаттара, бииргэ үлэлээбит дьоно, үөлээннээхтэрэ алтыспыт, үлэлээбит сылларын истиҥник ахтан-санаан аастылар.

Михаил Павлович РСФСР тыатын хаһаайыстыбатын үтүөлээх үлэһитэ, 1941-1945 Аҕа дойду Улуу сэриитин сылларыгар “Килбиэннээх үлэтин иһин” мэтээл хаһаайына, Саха АССР Үрдүкү Сэбиэтин дьокутаата, Мэҥэ Хаҥалас улууһун бочуоттаах олохтооҕо, «Октябрь»,  Ленин  аатынан колхуостары, К.К. Байкалов, Ленин ааттарынан сопхуостары үрдүк таһаарыылаахтык үлэлэппит уһулуччулаах салайааччы, Ленин уордьанын кавалера, ССКП Саха уобаластааҕы уонна Мэҥэ Хаҥаластааҕы кэмитиэттэрин чилиэнинэн хас да төгүллээн быыбарданан үлэлээбит киэн туттар биир дойдулаахпыт буолар.

Ытык киһибит бүүһүн оҥорууга скульптор, Арассыыйа худуоһунньуктарын Сойууһун чилиэнэ, СӨ худуоһунньуктарын Сойууһун бырабылыанньатын чилиэнэ Николай Чоччасов уонна худуоһунньук, СӨ култууратын туйгуна, Арассыыйа худуоһунньуктарын Сойууһун чилиэнэ,П.П. Романов аатынан Дьокуускайдааҕы ойуулуур-дьүһүннүүр училище (колледж) үрдүкү категориялаах преподавателэ, Михаил Павлович сиэнэ Михаил Захаров кыттыыны ыллылар.

Бу күн «Экспресс» саҥа көлүөнэ бибилэтиэкэтигэр Михаил Павловичка аналлаах быыстапканы көрүү, «Дьон санаатын түмэн» документальнай киинэ сүрэхтэниитэ буолла. Ыраахтан-чугастан мустубут бар дьон ирэ-хоро кэпсэтэн, санааларын атастаһан, сэргэхсийэн тарҕастылар. Тэрийээччилэргэ истиҥ көрсүһүү тэриллибитигэр махтал тылларын эттилэр.

Мэҥэ Хаҥалас улууһун дьаһалтатын пресс-сулууспата