Михаил Лукачевскай саҥа киинэтэ сүрэхтэннэ

Бүгүн, балаҕан ыйын 14 күнүгэр, ХИФУ устудьуоннарын көҕүлээһин киинигэр  «Там, где танцуют стерхи» диэн саҥа киинэни сүрэхтээтилэр. «Сайсары Синема» айар түмсүү (режиссер Михаил Лукачевскай) Кыталык Уйбаан «Кустугу ситтэрбиэн» диэн кинигэтинэн уһуллубут оҕолорго аналлаах киинэтин үөрэнээччилэргэ, устудьуоннарга көрдөрдүлэр.

Бу киинэҕэ хаампат оҕо эйгэтэ, дьону кытта сыһыана, күүстээх санаата, дьулуура көстөр. Киинэ көмүс күһүн күлүмүрдээн турдаҕына, кэрэ айылҕалаах Амма сиригэр уһуллубут. Көрөөччүлэр оҕолор олус үчүгэйдик оонньообуттарын бэлиэтээтилэр. Маны сэргэ, Зоя Попова, Ньургуйаана Шадрина, Ньургун Бэчигэн, уо.д.а. биллэр артыыстар оонньообуттар.

Бу оҕолор, ыччаттар хайдах ылыналларын билэр сыаллаах, сабыылаах көрдөрүү буолар, киинэни эһиил, сааскы каникул саҕана улахан экраҥҥа таһаарар былааннаахтар. Бу көрдөрүүгэ Кыталык Уйбаан кэргэнэ Сардаана Дьячковская уонна кыыһа кэлэн кыттыбыттара бэлиэ түгэн буолла. Кинилэр киинэни сөбүлээбиттэрин туһунан эттилэр. Аҕалара бу кэмҥэ тыаҕа, ойуурга сылдьар диэн кэпсээтилэр.

Режиссер Михаил Лукачевскай оҕо сылдьан Кыталык Уйбаан дэриэбинэҕэ кэлэн кэпсиирин олоҥхо курдук истэрин, кэлин кинигэтин ааҕан баран, киинэ устар санаата арахпатаҕын туһунан кэпсээтэ. Кэрэхсэбиллээҕэ диэн, ыччат дьон киинэни олус сөбүлээн көрдүлэр: сороҕор тэҥҥэ күлэн, долгуйан, ытаан да ыллылар. Бу кэниттэн бэйэлэрин санааларын үллэһиннилэр.

Сардаана Иванова, устудьуон:

— Бу киинэ олус үчүгэйдик уһуллубут диэн көрдүм. Оҕолор дьиҥнээх артыыс курдук наһаа үчүгэйдик оонньообуттарын кэрэхсээтим, итэҕэйдим. Бу киинэҕэ оҕо дууһата, ис санаата олус үчүгэйдик көстөр. Айар эйгэлээх дьон хайдах толкуйдууллара, олоҕу көрөллөрө интэриэһинэй. Оҕо аҕатын кытта сыһыана эмиэ бэркэ арыллыбыт. Онон киһи дууһатын таарыйар. Оҕолорго интэриэһинэй буолуо дии саныыбын.

Сардаана Дьячковская, Кыталык Уйбаан кэргэнэ:

— Бу киинэни бастакынан көрөөччүлэр буолбуппутуттан олус үөрдүм, астынным. Улахан экраҥҥа киинэ тыйаатырдарыгар тахсарын кэтэһэбит. Киинэни устубут бөлөххө, режиссер Михаил Лукачевскайга биһиги дьиэ кэргэн аатыттан улахан махталбытын тиэрдэбит. Киинэ наһаа үчүгэйдик уһуллубут дии санаатым. Оҕолор идэтийбит артыыстартан туох да итэҕэһэ суохтук оонньоотулар, оруолларын киһи итэҕэйэр курдук тиэрдэллэр. Амма кэрэ айылҕатын көрөн үөрдүбүт. «Кустугу ситтэрбиэн» диэн автобиографическай сэһэн наһаа уһун, ону режиссер элбэх түгэни хабан, сүрүн идиэйэтин биир киинэҕэ тиэрдибит. Ити бастакы чааһа, Иван Ионович олоҕун кэпсиир кинигэ иккис чааһа суруллубута, сотору тахсыаҕа.