Мииринэй куорат олохтоохторун кыайыы туһугар көмөлөрө салҕанар

Быстах хомуур саҕаланыаҕыттан Мииринэй оройуонун уонна Мииринэй куорат олохтоохторо хомуурга түбэспит уолаттарыгар, байыаннай сулууспалаахтарыгар уонна кинилэр дьиэ кэргэннэригэр көмө оҥорууга көхтөөхтүк кытта сылдьалларын туһунан Мииринэй куоратын баһылыгын бастакы солбуйааччы Николай Макарович Ноттосов кэпсиир.

— Биһиги оройуоммут киин куоратын салалтата уонна олохтоохторо байыаннай эпэрээссийэ уонна быстах хомуур саҕаланыаҕыттан ыла буойуттарбытыгар уонна кинилэр дьиэ кэргэттэригэр көмөнү утумнаахтык ыыта олоробут. Ол курдук, социальнай көмүскэл хайысхатынан оҥоһуллар өйөбүл төлөбүрдэртэн ураты, хомуурга барбыт дьон дьиэ кэргэттэригэр Мииринэй куорат уонна Мииринэй оройуонун дьаһалталарынан көмө араас көрүҥнэрэ оҥоһуллаллар.

Оройуон дьаһалтатыттан 100 тыһ. солк. биирдэ бэриллэр төлөбүр, 50 тыһ. солк — чэпчэки бааһырыыга, 100 тыһ. солк. — ыарахан бааһырыыга, хомуурга барбыт киһи олохтон туораабыт түбэлтэтигэр – 500 тыһ. солк. өйөбүл көрүллэр. Итини таһынан, хомуурга барбыт дьон оҕолоругар доруобуйаны тупсарар «Орленок” диэн оҕо лааҕырыгар, оҕо уһуйааннарыгар босхо путевкалар түҥэтиллэллэр.
Мииринэй куоратын администрациятыттан оҥоһуллар матырыйаалынай көмө чэрчитинэн бааһырыыга — 50 тыһ. солк. уонна хомуурга барбыт киһи олохтон туораабыт түбэлтэтигэр – 100 тыһ. солк. төлөнөр. Ону таһынан, хомуурга барбыт дьон дьиэ кэргэннэриттэн биирдэ бэриллэр материальнай көмөҕө эбэтэр олох-дьаһах араас кыһалҕаларын быһаарар көмөҕө наадыйалларын туһунан сайабылыанньа киирэр түгэнигэр оройуон уонна куорат волонтерскай хамсааһыннарынан чопчу аадырыстаммыт көмөлөрө оҥоһуллар итиэннэ муниципальнай уопастыбаннай тырааныспарга босхо айан, чэпчэтиллибит сыананан куораппыт баанньыгар сылдьыыга толуоннар, онтон да атын кэккэ өйөбүллэр кэрискэлэрэ оҥоһуллан, дьоммутугар көмөлөһө олоробут.

Быстах хомуур саҕаланыаҕыттан Мииринэй оройонун олохтоохторо хомуурга түбэспит уолаттарбытыгар, байыаннай сулууспалаахтарбытыгар уонна кинилэр дьиэ кэргэннэригэр көмө оҥорууга көхтөөхтүк кытталлар. Биирдилээн дьонтон тус аадырыстаах көмөлөр киирэллэр. Ону таһынан “Народнай актыып” уонна “Не рядом, но вместе” курдук, волонтерскай хамсааһыннартан эмиэ көмө үчүгэй. Ким да туора турбат. Ол курдук “Народнай актыып” оҥорбут пуондатыгар Мииринэй оройуонун тэрилтэлэриттэн күннээҕи хамнастарын ыытыы, араас байыаннай сэби-сэбиргэли, анал оборудованиены атыылаһыы, маскировочнай сиэккэлэри уонна да араас байыаннай таҥаһы тигии тохтообокко бара турар.

Ааспыт сыл бүтүүтүттэн саҕалаан Мииринэй оройуонун олохтоохторо хомуйбут гуманитарнай көмөлөрүн быһаччы анал байыаннай эпэрээссийэ буола турар зонатыгар илдьиинэн үс волонтерскай бөлөх дьарыктанар. Байыаннай эпэрээссийэ ыытыллар сиригэр сулууспалыы сылдьар уолаттарбытыгар наадалаах гуманитарнай көмөнү тиэрдиигэ үлэлиир биир бөлөҕү кытта улуустан илдьибит көмөбүтүн буойуттарбытыгар тиксэриигэ барсан, үлэлэһэн кэлбитим. Дьоммут санаалара бөҕөх, илдьибит көмөбүт олус наадалааҕын, дойдуларын өйөбүлэ санааларын күүһүрдэрин, хайаан да кыайыы буолуо диэн эрэнэллэрин туһунан этэллэр.