Мииринэй оҕолорун ийэлэригэр төннөрдүлэр

«Оҕо дьиэтигэр барыахпын баҕарбаппын» диэн оҕо ытыыр видеота тарҕанан, бу күннэргэ оҕолор уонна ийэ дьылҕата үгүс дьон болҕомтотун тарта. Бүгүн СӨ Оҕо быраабын көмүскүүр боломуочунай Туяра Васильева оҕолор ийэлэригэр төннөрүллүбүттэрин туһунан иһитиннэрдэ:

— Бүгүн, атырдьах ыйын 29 күнүгэр, РФ Бэрэсидьиэнин иһинэн оҕо быраабын көмүскүүр боломуочунайын аппараатын  юридическай өйөбүлүн көмөтүнэн, СӨ Үлэ миниистирин солбуйааччытын сорудаҕынан, Мииринэй оройуонун «Харысхал» киин дириэктэрэ оҕолору ийэлэригэр төннөрүү туһунан бирикээһэ таҕыста. Бүгүҥҥү күҥҥэ ийэ бырааба быһыллыбата, хааччахтаммата, суут быһаарыыта билиҥҥитэ суоҕунан, оҕолор ийэлэрин кытта бииргэ буолуохтара. Биһиги суукка анаан ийэни өйүүр сурук бэлэмнииибит. Онон бу боппуруос биһиги тус хонтуруолбутугар буолар. Эдэр ийэни, Валентина Семеновнаны арыаллыахпыт, көмөлөһүөхпүт. Саамай сүрүнэ — оҕолор дьиэ кэргэҥҥэ, ийэлэрин аттыгар сылдьаллара буолар. Оттон биһиги уустук кэмҥэ илиибитин уунарга бэлэммит.