Мииринэй олохтооҕо атын киһи массыынатын бэйэтигэр иҥэриммит

ИДьМ сулууспатын Мииринэйдээҕи отделын силиэстийэлиир отделынан 34 саастаах олохтоох киһиэхэ атын киһи массыынатын иҥэриниигэ холуобунай дьыала тэрилиннэ.

ИДьМ пресс-сулууспатын иһитиннэриитинэн, буруйдаах доҕорун массыынатынан иэһин төлөөбүт.

Силиэстийэ быһаарыытынан, эмсэҕэлээччи атын эрэгийиэҥҥэ олохсуйа бараары «Honda» мааркалаах массыынатын буруйданааччыга харайтара хаалларбыт. Ол кэмҥэ буруйданааччы үбүнэн-харчынан ыарахаттары көрсүбүт – бэйэтин дьыалатын арына сатаан, улахан иэскэ киирбит.

Иэс биэрбит дьонтон биирдэстэрэ харчытын төннөрөрүн ирдээбитигэр, буруйдаах иэһин суотугар атын киһи тимир көлөтүн биэрбит. Хоромньу суумата 240 000 солк. буолбут.