Мииринэй оройуона 2030 сылга диэри сайдыахтаах стратегическай сыаллара чопчуламмыттар

Ил Дархан Айсен Николаев Мииринэй улууһугар сырыытын кэмигэр “Алмаастаах кыраай” олохтоох тэлэбиидэнньэҕэ быһа эпииргэ тахсан, оройуон олохтоохторун ыйытыыларыгар хоруйдаата.

Быһа эпиир кэмигэр Ил Дархаҥҥа уопсайа отуттан тахса боппуруос киирдэ. Айсен Николаев алмаастаах кыраай олохтоохторун долгутар тирээн турар суолталаах үгүс ыйытыыларга сиһилии астыннарар хоруйдары, быһаарыылары биэрдэ. Оттон эпиир бириэмэтэ кылгаһынан хоруйдамматах муниципальнай суолталаах олох-дьаһах сорох боппуруостара олохтоох былаас туһааннаах салайааччыларын болҕомтолоругар туһаайылынна.
Айсен Николаев быһа эпиири саҕалыырыгар Мииринэй оройуона өрөспүүбүлүкэҕэ, Уһук Илиҥҥи федеральнай уокурукка, дойдуга улахан стратегическай суолталаах оройуон буоларынан оройуон Ил Дархан болҕомтотун киинигэр баарын туһунан кэпсээтэ. Манан сибээстээн Ил Дархан «Мииринэй улууһун сайыннарыы туһунан” 2022 сыл атырдьах ыйын 21 күнүгэр Ыйаах таһаарбытын бэлиэтээтэ. Бу Ыйаахха этиллэринэн, оройуон 2030 сылга диэри сайдыахтаах стратегическай сыаллара чопчуламмыттар.