Мииринэй волонтердара байыаннай дьайыы кыттыылаахтарыгар нэдиэлэ аайы туоннаттан тахса көмөнү ыыталлар

Мииринэй куорат волонтердара байыаннай дьайыы кыттыылаахтарыгар нэдиэлэ аайы биир туоннаттан тахса гуманитарнай көмөнү ыыталлар. Бу туһунан бүгүн «Якутия 24» телеханаал «Актуальное интервью» биэриитин эпииригэр Аҕа дойду буойуннарын дьиэ кэргэттэрин кэмитиэтин чилиэнэ, волонтер Ирина Федорова иһитиннэрдэ.

«Волонтер буолуу – байыаннай дьайыы кыттыылааҕа буолар уолгун кытта аттыгар буоларга дьулуһуу. Уолаттар онно биһиги туспутугар кыргыһаллар, оттон биһиги манна кинилэр тустарыгар кыһаллабыт. Кинилэр фронҥа курдук, биһиги эмиэ манна сомоҕолоһуохпутун, санны санныга буолуохпутун наада. Бу – биһиги дойдубут хас биирдии гражданинын иэһэ», – диэн Ирина Федорова санаатын үллэһиннэ.

Кини бэлиэтээбитинэн, Аҕа дойду буойуннарын дьиэ кэргэттэрин кэмитиэтэ байыаннайдар дьиэ кэргэттэрин туһугар уоскулаҥнаах буолалларын, кинилэргэ бары наадалаах көмө оҥоһуллуоҕар эрэллээх буолалларын туһугар кыаллар барыны барытын оҥорор.

«Бу уопсай үлэҕэ Мииринэй оройуонун бары волонтерскай тэрилтэлэрэ, былаас уорганнара кыттыһаллар. Сылга хаста да оройуон бэрэстэбиитэллэрэ гуманитарнай миссиялаах байыаннай дьайыы ыытыллар сиригэр тиийэн, байыаннайдарга сыаналаах тэриллэри тиэрдэллэр: генератордары, радиостанциялары уонна квадрокоптердары», – диэн Ирина Федорова кэпсээтэ. Волонтер ыччаты патриотическай тыыҥҥа иитии суолтатын эттэ.

«Улуу Кыайыы сиэннэрэ уонна хос сиэннэрэ биһиги хаһан да бэриммэппитин, бэйэ дьоммутун бырахпаппытын уонна хайаан да кыайыахтаахпытын билиэхтээхтэр. Кэнчээри ыччат устуоруйа кырдьыгын, бэйэтин төрүттэрин уонна кинилэр тымырдарыгар кыайыылаахтар хааннара сүүрэрин өйдүөхтээх». Ирина Федорова III Өрөспүүбүлүкэтээҕи Фашизмы утары пуоруму үрдүктүк сыаналаата.