Мииринэйдээҕи интэринээт-дьиэҕэ сахалыы хос баар буолла

Мииринэйдээҕи кырдьаҕастар, инбэлииттэр интэринээт-дьиэлэригэр «Земля Олонхо» диэн сахалыы истииллээх сынньанар хос аһылынна. Бу бырайыакка Иркутскайдааҕы ньиэп хампаанньата көмөлөстө.

Сынньанар хос истиэнэтигэр олоҥхо матыыбынан Саха сирин айылҕатын кэрэ көстүүтүн ойуулаатылар, Аал Луук Мас быһыылаах стеллаһы оҥордулар. Саха үнүстүрүмүөннэрин, эспэнээттэри, сувенирдары уонна маастар-кылаастарга аналлаах матырыйааллары атыыластылар.

Былырыын интэринээт-дьиэ Иркутскайдааҕы ньиэп хампаанньатын «Энергия родной земли» гранын ылбыта. Интэринээт-дьиэ дириэктэрэ Ольга Белозерова иһитиннэрбитинэн, сахалыы ис барааннаах сынньанар хос баар буолбутуттан олохтоохтор олус үөрбүттэр. Манна араас тэрээһиннэри, биэчэрдэри, маастар-кылаастары, муусукаҕа дьарыктары ыытар буолбуттар.

Хаартыска: Мииринэйдээҕи кырдьаҕастар, инбэлииттэр интэринээт-дьиэлэрэ.