Мииринэйдээҕи Политехническэй лиссиэйгэ саҥа спортивнай саала тутулла турар

Ил Дархан Айсен Николаев Мииринэйгэ оробуочай сырыытын кэмигэр Политехническэй лиссиэй  саҥа  спортивнай саалатын тутуутун хаамыытын билистэ.

Эбийиэк үлэҕэ киирэрэ бэлэм турар. Ил Дархан тутуу силигэ ситтэҕинэ үлэҕэ киллэриллиитин көҥүлүн ылыы боппуруоһун түргэтэтэргэ эттэ.

Ил Дархан саҥа саала физкультуура уруогун ыытар уонна эрчиллэр сиринэн эрэ буолбакка, араас күрэхтэһиилэр, уопсастыбаннай тэрээһиннэр ыытыллар   былаһааккаларынан буолуоҕа диэн бэлиэтээтэ.

Урут уруоктар оскуола иһигэр баар аныгы ирдэбилгэ эппиэттээбэт  спортивнай саалаҕа ыытыллаллара.

Саҥа эбийиэк  2 тыһ. кв м иэннээх, аныгы спортивнай тэрилинэн хааччыллыбыт.

Бырайыак «Биир ньыгыл Арассыыйа» баартыйа өйөбүлүнэн «Народный актив» уопсастыбаннай хамсааһын уонна мииринэйдэр көҕүлээһиннэринэн олоххо киирдэ.

Санатан эттэххэ,  социальнай инфраструктураны  саҥардыы Ил Дархан Мииринэй оройуонун 2030 сылга диэри сайыннарыы ыйааҕыгар олоҕурда.