Мииринэйдэр успуорт эбийиэгин тутууну, балыыһа өрөмүөнүн туруорсаллар

Мииринэй нэһилиэнньэлээх пууннарыгар СӨ Бырабыыталыстыбатын 2025 сыллааҕы үлэтин отчуоттуур мунньаҕын иккис күнэ.

Бөлөҕү СӨ Бырабыыталыстыбатын Бэрэссэдээтэлин солбуйааччы Ольга Балабкина салайан илдьэ сылдьар. Бэҕэһээ, олунньу 9 күнүгэр, түөрт хос бөлөххө арахсаннар Айхалга, Сүлдьүкээргэ, Чернышевскайга, Светлэйгэ, Таас Үрэххэ уонна Удачнайга үлэлээтилэр, үлэни-хамнаһы сырдаттылар, дьон-сэргэ ыйытыытыгар хоруйдаатылар, олохтоохтор санааларын, туруорсууларын иһиттилэр.

Бастакы хос бөлөх вице-премьер Ольга Балабкина салалтатынан Чернышевскай уонна Светлэй олохтоохторун кытта көрсүбүтэ. Отчуокка 265 киһи кыттыыны ылбыт. Өрөспүүбүлүкэ экэниэмикэтин уонна социальнай эйгэтин сүрүн көрдөрүүлэрин туһунан Ольга Балабкина иһитиннэрбит итиэннэ демография көрдөрүүтүгэр тохтообут.

—Саха сиригэр мөлүйүөн ахсааны толорон Саина манна, Мииринэйгэ, төрөөбүтэ үөрүүлээх. Ааспыт 2025 сылга Саха сиригэр 10 327 оҕо төрөөтө, итинтэн 488 — мииринэйдэр., — диэтэ Бырабыыталыстыба Бэрэссэдээтэлин солбуйааччы. Маннык көрдөрүүнү ситиһии — дьиэ кэргэттэри өйүүр өрөспүүбүлүкэ салалтатын кэлим үлэтин түмүгэ.  Манна даҕатан эттэххэ, бу үп-харчы өттүнэн көмө мэхэньиисимнэрин таһынан, уустуктары көрсөр ыалларга көмөлөһөр аналлаах өҥө сектора эмиэ сайдар. Ол курдук, сыл устатыгар элбэх хайысхалаах дьиэ кэргэн икки киинэ аһылынна. Онтон биирдэстэрэ Мииринэйгэ аһыллыбыт.

СӨ Бырабыыталыстыбатын вице-премьерэ Ольга Балабкина отчуот кэмигэр Мииринэй нэһилиэнньэлээх пууннарын олохтоохторуттан киирбит ыйытыылар олохтоохторго уһулуччу суолталаахтарын уонна бөһүөлэккэ инфраструктура, олох усулуобуйатын тупсарыыга туһуламмыттарын бэлиэтээтэ. Холобур, чэпчэтиилээх эминэн хааччыллыы боппуруостара бэриллибиттэр, маны Бырабыыталыстыба ураты хонтуруолга ылла. Чернышевскайга бөһүөлэги гаастааһын, уот тарыыбын туһунан ыйыппыттар. Итиэннэ өрөспүүбүлүкэ таһыгар тахсарга үлэ бэтэрээннэригэр төлөбүргэ сүбэ-ама ылбыттар. Маны таһынан, бөһүөлэккэ баанньыгы тутуу, балыыһа өрөмүөнэ, кырдьаҕастар уонна инбэлииттэр дьиэлэрэ, «Мухтуйа» айан суолун туруга олохтоохтору долгутара этиллибит.

Светлэй олохтоохторо бөһүөлэктэригэр успуорт эбийиэгин тутар хайаан да наадатын бэлиэтээбиттэр. Маны тэҥэ,  Мииринэйдээҕи тэхиньиичэскэй кэллиэс успуорт саалатын саҥардыыны, Светлэйгэ сабыылаах успуорт саалатын тутууну уонна успуорт былаһааккатын туруорсубуттар.

Бүгүн Арыылаахха, Заряҕа, Алмазнайга уонна Мииринэйгэ отчуот буола турар. Санатан эттэххэ, СӨ Бырабыыталыстыбатын отчуота олунньу 2 күнүттэн саҕаламмыта уонна кулун тутарга диэри буолар. Саха сирин олохтоохторо ыйытыыларын биэрэннэр, толору хоруйдары ылаллар. Түмүктэри «Саха» НКИХ көрүөххүт.

Сиһилии: https://www.sakha.gov.ru/news/22504

СӨ Ил Дарханын уонна Бырабыыталыстыбатын пресс-сулууспата