Мииринэйгэ 18 тыһ. тахса бытыылка арыгы былдьанна

Саха сиригэр полицейскайдар сокуоннайа суох эргиниигэ анаммыт  18 тыһ. тахса бытыылка маркировката суох арыгыны буллулар.

Бу туһунан Саха сиринээҕи ИДьМ пресс-сулууспата иһитиннэрэр. ИДьМ отделын үлэһиттэрэ Мииринэй оройуонугар сокуоннайа суох арыгыны эргиниигэ 55 саастаах олохтоох урбаанньыт кыттыгастааҕын туһунан иһитиннэриини ылбыттар. Полициялар  Мииринэйгэ  атыы-эргиэн киинин территориятыгар ыскылааты бэрэбиэркэлээбиттэр. Онтон 900-тэн тахса дьааһыкка 18 тыһыынчаттан тахса маркировката суох буокка үс көрүҥэ хараллыбытын былдьаабыттар.

Былдьаммыт арыгы уопсай кээмэйэ 9 тыһыынчаттан тахса лиитэрэ кэриҥэ буолар, оттон сыанатынан 5,4 мөлүйүөн солк. Полиция чахчыларынан, сымыйа арыгы салгыы эргиниигэ анаммыта быһаарылынна. Былдьаммыт табаардары чинчийиигэ ыыттылар. Холууобунай дьыала тэрилиннэ.