Мииринэйгэ баһаарга дьахтар эмсэҕэлээтэ

Бүгүн күнүс Мииринэйгэ элбэх кыбартыыралаах дьиэҕэ баһаар буолла. Уокка биэнсийэлээх дьахтар эмсэҕэлээбит. Бу туһунан Саха сирин ЫБММ пресс-сулууспата иһитиннэрэр.

Баһаар буолбутун туһунан иһитиннэрии 12:36 чааска киирбит. Баһаарынай сулууспа кэлэр кэмигэр иккис этээскэ баар кыбартыыра умайа турар эбит. Быыһааччылар 1960 с.т. эмсэҕэлээбит дьахтары булбуттар. Барыта дьиэттэн 10 киһини эвакуациялаабыттар.

Баһаарга биир кыбартыыра бүтүннүү умайбыт. Ону таһынан атын кыбартыыралар үрдүлэрэ, подъезд уонна дьиэ таһа умайбыттар.

Баһаары умуруорууга барыта 32 киһи уонна 8 тиэхиньикэ үлэлээтэ.