Мииринэйгэ, Быраҥаат ууһун сиригэр

2025 сыл кулун тутар 15 күнүгэр Мииринэй куораттан чугас сытар Чуоналыыр үрэх бэс чагдатыгар баар “Олом” родовой община (бэрэссэдээтэл Георгий Иванов) тэрийбит сынньалаҥ баазатыгар аан бастакытын улууска олохтоох хоту сир төрүт олохтоохторун “Аяман Салдын” диэн түмсүү-бэстибээлэ буолан ааста. Ботуобуйа нэһилиэгиттэн элбэх киһилээх дэлэгээссийэ, Дьокуускай куораттан “Долгунча” ансаамбыл, Өлөөнтөн ыалдьыттар киэҥ бырагыраамалаах тэрээһиҥҥэ кыттыыны ыллылар.

Өр сылларга архыып матырыйааллара үөрэтиллэн, билиҥҥи Мииринэй оройуонун сиригэр-уотугар Быраҥаат тоҥус ууһа Улахан Ботуобуйаҕа олорбута биллибитэ, бигэргэтиллибитэ. Бу улахан үлэни иилээбит-саҕалаабыт, үөрэппит, киэҥ эйгэҕэ таһаарбыт Улахан Ботуобуйаттан тардыылаах кыыспыт, история билимин дуоктара, Гуманитарнай чинчийии институтун дириэктэрэ, академик Сардаана Ильинична Бояковаҕа махталбыт муҥура суох.

Бу бастакы түмсүү-бэстибээл сүрүн тэрийээччилэриттэн биирдэстэрэ Сардаана Константиновна Андреева – бу дойду төрүт олохтоохторун сыдьаана.

Тэрээһиммит Өлөөн алгысчыта Быраҥаат ууһун төрүт дойдутугар сүгүрүйэн аал уоту оттон, ас кээһэн алҕааһынынан саҕаланна. Өссө үөрүүлээҕэ, биир уустаахпыт, аан дойдуга аатырбыт этно-ырыаһыт, СӨ култууратын туйгуна Саина күндү ыалдьыт буолла, ырыатынан-тойугунан киэргэттэ.

Ботуобуйа нэһилиэгиттэн кэлбит элбэх киһилээх дэлэгээссийэ көрү көҕүлүттэн тутан, аһы-үөлү дэлэччи тардан түмсүү-бэстибээл биир киэргэлинэн буолла.“Ботуобуйа долгуннара” ансаамбыл кыттыылаахтара: Матрена Пинигина, Антонина Максимова, Антонина Наумова, Зинаида Петрова, Надежда Хоютанова, Ульяна Попова, Анатолий Евдокаров төрүт ас-үөл астааһыныгар, өбүгэлэрбит тоҥус уустарын малларын-салларын быыстапкатыгар төһүү күүс, тыл-өс буоллулар. Киэҥ түһүлгэҕэ ураһа киэргэтэн, төрүт таҥаспытын таҥнан-симэнэн, эбэҥкилии ыллаан эйээрдибит, оҕолорбут үҥкүүлээн дайдылар.

Төрүт омук ииһин-ууһун, таҥаһын-сабын көрүү быыстапкаҕа Зоя Данилова, СӨ уус-уран оҥоһуктарын маастара Валентина Попова, СӨ уус-уран оҥоһуктарын маастара, Сунтаар улууһун норуотун маастара Ульяна Попова кыттан үлэлэрэ киэҥ эйгэҕэ тахсан үрдүктүк сыаналанан, дипломнарынан, сыаналаах бириистэринэн наҕараадаланнылар.

Аны хайа омук түмсүүтэ күрэһэ суох буолуой. Дьэ онно Ботуобуйа сиригэр-уотугар уутуйан олохсуйбут Быраҥаат тоҥус ууһун кэнчээри ыччаттара Мичил Саввинов, Антон, Нестор Евсеевтэр, Евгений Лонкунов, Сергей Адамов таба сыарҕатын үрдүнэн ойон кыыратан, сэбэһэни субуйа быраҕан, курдаан тустан, тоҥуу хаарга буурдаан сүүрэн, ох саанан бэргэнник ытан бастаан, кыайыы өрөгөйүн биллилэр. Хамаанданы иилээн-саҕалаан кытыннарда күтүөппүт Николай Иванов.

Бастакы түмсүү-бэстибээл бэрт сэргэхтик ааста, төрүт үгэспит, дьарыкпыт үөрэтиллэн, сөргүтүллэн кэнчээри ыччаппытыгар үйэлэргэ бэриллэн иһэригэр эрэл баар.
Зоя Данилова.