Мииринэйгэ дьахтар урукку эрин күнүүлээн быһаҕынан анньыбыт

Мииринэй оройуонун ИДьМ дознаниетын отделениета Светлай бөһүөлэккэ 55 саастаах олохтоох дьахтара урукку эрин быһаҕынан анньыбытынан холуобунай дьыала тэрийдэ. Иирсээн эр киһи итирик туруктаах сылдьыбыт кэмигэр тахсыбыт.

Силиэстийэ быһаарыытынан, быһылаан буолбут күнүгэр эр киһи итирик туруктаах уорбаланааччы дьахтарга ыалдьыттыы тиийбит. Кэпсэтии кэмигэр эр киһи саҥа ойохтоммутунан уонна үчүгэйдик олорорунан киһиргэммит. Дьахтар күүнүүлээн остуолтан быһаҕы сулбу тардан, эр киһини саннытыгар быһаҕынан анньыбыт. Ол кэннэ бэйэтэ суһал көмө сулууспатын ыҥырбыт диэн ИДьМ сулууспатын Мииринэйдээҕи отделениета суруйар.