Мииринэйгэ электрониканы өрөмүөннүүрүнэн албыннаабыт түөкүнү туттулар

Мииринэй улууһун полициятын дьуһуурунай чааһыгар олохтоох дьахтар түөкүннээһин туһунан сайабылыанньа суруйбут. Материальнай хоромньу 10 000 солкуобайтан тахса буолбут, диэн ИДьМ пресс-сулууспата иһитиннэрэр.

Суһал-көрдүүр дьаһалларынан холуобунай ирдэбил үлэһиттэрэ уорбаланааччыны быһаардылар.  50 саастаах эр киһи буолара биллибит. Силиэстийэҕэ быһаарыллыбытынан, буруйу оҥорооччу электрониканы уонна дьиэҕэ туттуллар тэриллэри өрөмүөннүүр өҥөнү оҥорорун туһунан биллэрбит. Сайабылыанньалаах дьахтар биллэриини көрөн, үлэһити кытта сибээстэспит. Тэлэбиисэри өрөмүөннүүргэ наадалаах чаастары атыылаһабын диэн эр киһи эрдэттэн төлөбүр сороҕун ирдээбит. Харчыны ылан баран, өрөмүөнү оҥорботох уонна тиэхиньикэни төннөрөрүн уһаппыт. Ол иһин дьахтар полицияҕа тыллаабыт. Эмсэҕэлээччигэ тэлэбиисэри урукку туругунан төннөрбүттэр.РФ Холуобунай кодексатын 159-с ыстатыйатын 2-с чааһынан («Түөкүннээһин») холуобунай дьыала тэрилиннэ.