Мииринэйгэ эр киһи кыбартыыраҕа киирэн, оҕону күүһүлүү сатаабыт

Мииринэй оройуонугар эр киһи атын дьон  кыбартыыратыгар киирэн, утуйа сытар кыыска саба түһэн күүһүлүү сатаабыт. Саха сиринээҕи Силиэстийэлиир кэмитиэтин пресс-сулууспата иһитиннэрэринэн, 27 саастаах эр киһи тутуллубут.

«Силиэстийэ дааннайынан,  алтынньы 12 күнүгэр буруйданааччы Мииринэй куорат биир дьиэтин кыбартыыратыгар уоран киирбит. Онно утуйа сытар кыыһы көрөн, киниэхэ сексуальнай хабааннаах дьайыылары оҥоро сатаабыт. Кыра саастаах кыыс күүскэ утарсан хаһыытаабытыгар, буруйданааччы күрээбит. Атын хоско утуйа сыппыт кыыс ийэтэ полиция үлэһиттэрин ыҥырбыт», — диэн иһитиннэриигэ суруллар. Эр киһи аана хатаммакка турбут атын кыбартыыраҕа киирэн харчы, дьиэ хаһаайыттарын малларын, ону таһынан массыына күлүүһүн уорбут уонна ол массыынанан буруйу оҥорбут сирдэриттэн күрээбит. Буруйу оҥорооччуну полиция суһал-көрдүүр салаа үлэһиттэрэ түргэн кэм иһигэр быһааран туппуттар. Кини хаайыыга угуллубут. Билигин кыыска үрдүк таһымнаах психологическай көмө оҥоһуллар.