Мииринэйгэ Ил Дархан байыаннай сулууспалаах дьиэ кэргэнигэр сырытта

     Ил Дархан Мииринэйгэ байыаннай сулууспалаах дьиэ кэргэнигэр сырытта. Кини онно мобилизацияҕа барбыт байыас дьиэ кэргэнигэр көмөлөһөргө — умайбыт дьиэлэрин оннугар саҥаны тутталларыгар үп-харчы көрөллөрүгэр соруйда. Бу туһунан көрсүһүүгэ  Айсен Николаевтан байыаннай сулууспалаах кэргэнэ Ксения Султанова көрдөспүт.

     Ксения Максумяновна кэпсээбитинэн, урут кэтэх дьиэлэригэр олорбуттар. Оттон 2022 сыллаахха ахсынньыга баһаарга дьиэлэрэ-уоттара барыта былдьаммыт. Ол иһин, олорор дьиэ (маневреннай) пуондатыттан үс хостоох кыбартыыраны биэрбиттэр. Ол эрээри, ыал чааһынай дьиэлэниэн баҕарар.

     Кини дьиэ кэргэн  төлөбүрү ыларын, чэпчэтиинэн туһанарын токкоолоспут. Маныаха Ксения Максумяновна бары өйөбүлүнэн толору туһаммыттарын эппит. Ксения Султанова билигин оҕотун көрөн уоппускаҕа олорор. Дьиэ кэргэн икки оҕолоох, кыыстара алталаах, уоллара сэттэ ыйдаах. Аҕаларын кытта сибээһи туталлар, ханна сулууспалыырын билэллэр. Оттон оҕолор аҕаларын олус ахталлар, күүтэллэр. Ил Дархан бу дьиэ кэргэн аҕата сотору кэлэригэр баҕарда.

СӨ Ил Дарханын уонна Бырабыыталыстыбатын пресс-сулууспата